චන්දි නැති හේතුවටත් පිළිතුරු

බංග්ලාදේශය සමග ලබන 26 වනදා පැවැත්වෙන පළමු එක්දින ක්‍රිකට් තරගයෙන් පසුව ලසිත් මාලිංග ජාත්‍යන්තර එක්දින පිටියෙන් සමු ගන්නා බව ශ්‍රී ලංකා ක්‍රිකට් කණ්ඩායමේ නායක දිමුත් කරුණාරත්න පවසනවා.බංග්ලාදේශ තරගාවලිය සම්බන්ධයෙන් දැනුවත් කිරීමේ මාධ්‍ය හමුවට අද කොළඹ දී එක්වෙමින් ඔහු ඒ බව සදහන් කළා.ඉදිරීයේ දී පැවැත්වෙන සෑම තරගාවලියක දී ම නව ක්‍රීඩකයින් කිහිප දෙනෙකුට අවස්ථාව ලබා දෙන බව ද දිමුත් මෙහිදී කියා සිටියා.ලසිත් මාලිංග විශ්‍රාම ගැනීමෙන් පසු කඩුලු ලබා ගත හැකි පන්දු යවන්නන් සොයා ගැනීමේ අභියෝගයට ද ශ්‍රී ලංකාව මුහුණ දෙන බවයි දිමුත් කරුණාරත්න කියා සිටියේ.බංග්ලාදේශයට එරෙහි ශ්‍රී ලංකා සංචිතයට ලෝක කුසලාන සංචිතයේ අතිරේක ක්‍රීඩකයින් දෙදෙනෙකු ඇතුළත් නොවීම සම්බන්ධයෙන් ද මෙහිදී මාධ්‍යවේදියෙකු ප්‍රශ්න කර සිටියා.ඊට පිළිතුරු ලබා දුන් ශ්‍රී ලංකා කණ්ඩායමේ නායකයා කියා සිටියේ එංගලන්ත තණතීරුවලට ගැලපෙන පරිදි ලෝක කුසලාන සංචිතය නම් කළ බවයි.බංග්ලාදේශට එරෙහි සංචිතය නම් කර ඇත්තේ මෙරට තණතීරුවලට ගැලපෙන පරිදි බව ද දිමුත් සදහන් කළා.දිනේෂ් චන්දිමාල් සංචිතයට නම් නොකිරීම සම්බන්ධයෙන් විමසූ පැනයකට පිළිතුරු ලබා දුන් දිමුත් කරුණාරත්න පැවසුවේ එම පැනය තේරීම් කමිටුවෙන් විමසීම වඩාත් සුදුසු බවයි.කණ්ඩායමේ ඔහුට ක්‍රීඩා කිරීමට ඇති ස්ථානය සම්බන්ධයෙන් පවතින ගැටලු හේතුවෙන් චන්දිමාල් සංචිතයට නම් කර නොමැති බව ද ඔහු සදහන් කළා.කෙසේ වෙතත්, ඔහු ඉදිරි සැලසුම්වලින් සම්පූර්ණයෙන් ඉවත් කර නොමැති බවත්, ක්‍රීඩකයින් 30 දෙනෙකුගෙන් පමණ යුත් මූලික සංචිතයක ක්‍රීඩකයින් සමග ඉදිරි තරගාවලියන් සදහා ක්‍රීඩා කරන බවත් දිමුත් කියා සිටියා.2023 ලෝක කුසලානය සදහා ශක්තිමත් සංචිතයක් සකස් කර ගැනීම එහි අරමුණ බවයි ශ්‍රී ලංකා නායකයා කියා සිටියේ.

ද. අප්‍රිකානු නැඟීඑන පිලට ලකුණු 28 ක ජයක්

දකුණු අප්‍රිකානු නැඟීඑන කණ්ඩායම සහ ශ්‍රී ලංකා නැඟීඑන කණ්ඩායම අතර පොචෙස්ට්‍රෝම්හිදී අද (21 වැනිදා) අවසන්වූ තරගය ලකුණු 28 කින් ජයගත් දකුණු අප්‍රිකානු නැඟීඑන කණ්ඩායම ඒ අනුව තරග 2 කින් සමන්විත තරගාවලිට 1-0 ක් ලෙස පෙරමුණ ගැනීමටද සමත්විය.ජයග්‍රහණය සඳහා ලකුණු 331 ක ඉලක්කයක් හඹාගිය ශ්‍රී ලංකා නැඟීඑන කණ්ඩායමට සියලුදෙනා දැවී රැස්කිරීමට හැකිවූයේ ලකුණු 302 ක් පමණි.ලකුණු 214 කට කඩුලු 7 ක් අහිමිව තිබියදී නිශාන් පිරීස් සමගින් එක්ව අටවැනි කඩුල්ල සඳහා ලකුණු 58 ක සම්බන්ධතාවයක් ගොඩනැගූ මොහොමඞ් ශිරාස් ඉන් නොනැවතී ලසිත් ඇඹුල්දෙණිය සමගින්ද එක්ව ලකුණු 30 ක සම්බන්ධතාවයක් ගොඩනැගීමට සමත්විය.නමුත් 9 වැනි කඩුල්ල ලෙස ශිරාස් දැවීයාමත් සමගින් ශ්‍රී ලංකා නැඟීඑන කණ්ඩාය බලාපොරොත්තු සුන්වී ගියේය. පන්දු 96 කදී හතරේ පහර 7 ක් සමගින් ලකුණු 49 ක් රැස්කිරීමට මොහොමඞ් ශිරාස් සමත්වූ අතර නිශාන් පිරීස් පන්දු 57 කදී හතරේ පහර 2 ක් සමගින් ලකුණු 25 ක් රැස්කිරීමට සමත්විය.සිවුවැනි සහ අවසන් දිනට අද තරගය ආරම්භ කරනවිට කඩුල්ල දැවී ලකුණු 145 ක් රැස්කරගෙන සිටි ශ්‍රී ලංකා නැඟීඑන කණ්ඩායම ඉතිරි කඩුලු 9 ලකුණු 157 ක් තුල අහිමිකර ගත්තේය.මිනෝද් භානුක සහ පැතුම් නිස්සංක එක්ව දෙවැනි කඩුල්ල සඳහා ලකුණු 85 ක සම්බන්ධතාවයක් ගොඩනගමින් ජයග්‍රහණය දෙසට කණ්ඩායම රැගෙන ගියද මැදපෙළ පිතිකරුවන්ගේ දුර්වල පිතිහරඹය හේතුවෙන් ශ්‍රී ලංකා නැඟීඑන කණ්ඩායමෙන් ජයග්‍රහණය ගිලිහි ගියේය.මිනෝද් භානුක පන්දු 134 කදී හතරේ පහර 12 ක් සමගින් ලකුණු 89 ක් රැස්කළ අතර පැතුම් නිස්සංක පන්දු 117 කදී හයේ පහරක් සහ හතරේ පහර 3 ක් සමගින් ලකුණු 47 ක් රැස්කිරීමට සමත්විය.නන්ද්‍රි බර්ගර් සහ ලඩි බොකාකෝ කඩුලු 3 බැගින් ද මාක්‍රෝ ජන්සෙන් කඩුලු 2 ක් දවාගනිමින් දකුණු අප්‍රිකානු නැඟීඑන කණ්ඩායම ජයග්‍රහණය කරා රැගෙන යාමට සමත්වූහ.දකුණු අප්‍රිකානු නැඟීඑන කණ්ඩායම් පළමු ඉනිම – සියලුදෙනා දැවී 382.ශ්‍රී ලංකා නැඟීඑන කණ්ඩායම් පළමු ඉනිම – සියලුදෙනා දැවී 241
දකුණු අප්‍රිකානු නැඟීඑන කණ්ඩායම් දෙවැනි ඉනිම – සියලුදෙනා දැවී 289.ශ්‍රී ලංකා නැඟීඑන කණ්ඩායම් දෙවැනි ඉනිම – සියලුදෙනා දැවී 302
(හසිත බෝයගොඩ 33, මිනෝද් භානුක 89, පැතුම් නිස්සංක 47, නිශාන් පිරීස් 25, මොහොමඞ් ශිරාස් 49, නන්ද්‍රි බර්ගර් 38/3, ලඩි බොකාකෝ 70/3, මාක්‍රෝ ජන්සෙන් 58/2)

ලෝක කුසලාන අවසන් මහා තරඟයේදී

මම එහෙම කරා නම් ස්ටොක්ස් මගේ ඔළුවට බැට් එකෙන් ගහන්න ඉඩ තිබුණා – ලෝක කුසලාන අවසන් මහා තරඟයේදී එල්ල වන සියලු චෝදනා ගැන ධර්මසේන පිළිතුරු දුන්නේ මෙහෙමයි.අවුරුදු 44ක ලෝක කුසලාන ක්‍රිකට් ඉතිහාසය තුළ බොහෝ කලක් ගතවනතුරුම සිතෙන් ඈත් නොවන අවසන් තරගයක් දැකබලා ගන්නට බිලියන 2කට ආසන්න ක්‍රීඩාලෝලී ප්‍රජාවට පසුගියදා අවස්ථාව උදා වී තිබුණේ නවසීලන්තය හා එංගලන්තය අතර පැවැති අවසන් තරගයේදී සිදුවූ සිදුවීම් සමුදාය හේතුවෙනි.තරගය සම වීම, ඉන් පසු දෙපිලටම පිරිනැමුණු සුපිරි පන්දුවාරයද සම වීම මෙන්ම තවත් කරුණු කිහිපයක්ම එම ලෝක කුසලාන අවසන් තරගයේදී දැකගැනීමට ක්‍රීඩාලෝලීන්ට අවස්ථාව උදාවිය.කෙසේ වෙතත් එම අවසන් තරගයේ අවසන් පන්දුවාරයේ සිවුවැනි පන්දුවේදී පන්දු රැකීමේ නිරතව සිටි මාටින් ගප්ටිල් කඩුල්ල වෙත යොමුකළ පන්දුව බෙන් ස්ටොක්ස්ගේ පිත්තේ ගැටී 4 සීමාව වෙත යෑමේදී තරගයේ විනිසුරුවරයෙක් ලෙස කටයුතු කළ කුමාර ධර්මසේන විසින් එයට ලකුණු 6ක් ලබාදීම නිවැරදි නොවන බව පුනරූපණවලින් දිස්වීමත් සමඟ මෙරට ක්‍රීඩාලෝලීන් බොහෝ දෙනකුගේ අවධානය කුමාර ධර්මසේන වෙත යොමුවිය.හිටපු ක්‍රිකට් විනිසුරුවරයකුව සිටි සයිමන් ටෝෆල්ද මේ සම්බන්ධයෙන් ‘කට කැඩිච්ච’ වචන මාලාවක් එල්ල කිරීමත් සමඟ මෙම සිදුවීම සම්බන්ධයෙන් විවිධ මත ගොඩනැඟෙන්නට හේතු පාදක වී ඇති බැවින් මෙහි සත්‍යය සොයා යෑමට අපි තීරණය කළෙමු.ක්‍රිකට් නීති පද්ධතිය අනුව පන්දු රකින්නන් අතින් සිදුවන අතපසුවීමකදී හිමිවන ලකුණු පිරිනැමීමේදී එම අතපසුවීම සිදුවන අවස්ථාවේදී පිතිකරුවන් සම්පූර්ණ කර ඇති ලකුණු ප්‍රමාණය පමණක් ලබා දිය යුතු වුවත් නවසීලන්ත පිලේ ගප්ටිල් පන්දුව කඩුල්ල වෙත යොමු කරනවිට ස්ටොක්ස් හා රෂීඩ් දෙවැනි ලකුණ සම්පූර්ණ කිරීමට පැති මාරු කරගෙන නොසිටි අවස්ථාවක ලකුණු 5ක් ලබා දිය යුතුව තිබියදී ලකුණු 6ක් පිරිනැමීම පිළිබඳව කුමාර ධර්මසේන මහතාගෙන් ලැබුණේ මෙවන් පිළිතුරකි.

අපේ අය ලොකු කරන්න හදන දේ දිහා බැලුවහම මට කනගාටුවක් දැනෙනවා. මෙහෙම හිතන්න. ප්‍රධාන විනිසුරු හැටියට මම වයිඩ් එකක් දුන්නොත් ඒක කාටවත් වෙනස් කරන්න බැහැනේ. මේකත් එහෙම එකක්. මට මේ වගේ එකක් තුන්වැනි විනිසුරුවරයාගෙන් අහන්න බැහැ. මගේ අනෙක් විනිසුරුගෙන් විතරයි මට අහන්න පුළුවන්. ඉතින් අපි දෙන්නටම තේරිච්ච දෙයක් තමයි බෙන් ස්ටොක්ස් කියන ක්‍රීඩකයා අනෙක් පැත්තේ සීමාව සටහන් කරන කොට පන්දු රකින්නාගෙන් බෝලේ රිලීස් (මුදා හැරිය) වෙච්ච අවස්ථාවේදී ඒ දෙන්නා කේ‍රාස් කරලා (එකිනෙකා පසුකර) හිටියා කියලා තමයි අපට පේන්නේ. ඒත් ඕනෑම කෙනකුට තරගයෙන් පස්සේ කැමරාවලින් බලලා වෙනත් නිගමනයකට එන්න පුළුවන්. ඒවා බලනකොට අපිට වුණත් පේනවා එතැන වැරැද්දක් වෙලා තියෙනවා කියලා. හැබැයි තෙවැනි විනිසුරුවරයාට දාලා අපිට ඒ වැරැද්ද නැවත නිවැරැදි කරන්න බැහැ. නවසීලන්ත ක්‍රීඩකයා පන්දුව විකට් එකට යොමු කරන වෙලාවෙදී මෙයාලා දෙන්නා (ස්ටොක්ස් හා රෂීඩ්) ක්‍රීස් කරනවද කියලා (රේඛාව සටහන් කරනවද) බලන්න ඕන. මෙයාලා දෙන්නා කේ‍රාස් කරලද (එකිනෙකා පසුකර තිබෙනවාද යන්න) කියලා බලන්නත් ඕන. මේ හැම දෙයක්ම කරන්න මට ඇස් හයක් විතර තියෙන්න ඕන. ඔය වගේ දෙයක් තෙවැනි විනිසුරුවරයාට දැම්ම නම් හොඳයි කියලා ඕනෑම අයෙක් කියාවි. දැන් බලන්න වයිඩ් එකක්, නෝ බෝල් එකක් චෙක් කරගන්න අපි තෙවැනි විනිසුරුවරයාට දාන්නෙ නැහැ. එහෙම නම් අපි මෙතන ඉන්න ඕන නැහැනේ. මේකත් ඒ වගේ දෙයක්. මේ සිදුවීමත් තෙවැනි විනිසුරුවරයාට දාන්න බැහැ. එහෙම දැම්ම නම් ඔයා ඒක තෙවැනි විනිසුරුට දැම්මේ කොහොමද කියලා එංගලන්ත ක්‍රීඩකයන් ඇවිත් මගෙන් අහවි. එහෙම නැත්නම් ඔවුන් මැච් එක සෙල්ලම් නොකර එළියට යන්න තිබුණා. ඒ වගේම මම බෙන් ස්ටොක්ස් එහා පැත්තේ තබා ගත්තා නම් (පන්දුව පහර දෙන පැත්තට විරුද්ධ පැත්තෙ) එයා (බෙන් ස්ටොක්ස්) ඇවිල්ලා මගේ ඔළුවට බැට් එකෙන් ගහන්නත් ඉඩ තිබුණා. (සිනා සෙමින්) කොහොම වුණත් අයි.සී.සී. එකත් මම ගත්ත තීරණය ගැන මට ප්‍රශංසා කළා. අයි.සී.සී.යට ඒ ගැන ප්‍රශ්නයක් වුණා නම්, මම ගත්තු තීරණය වැරැදි නම් ඒ අය මාව එළියට දාන්න ඕන නේ. අදටත් ඒ අය (අයි.සී.සී.ය) ඒ ගැන මගෙන් අහලා නැහැ….

තරගයෙන් පස්සේ නවසීලන්ත ක්‍රීඩකයන් මේ සම්බන්ධයෙන් කතා කළාද?මොනවද එයාලා මගෙන් ඇවිල්ලා අහන්නේ. උදාහරණයක් කියන්නම් මම වයිඩ් නැති එකක් වයිඩ් එකක් කියලා දෙනවා. මැච් එක ඉවර වෙලා ඒ අය මගෙන් ඇවිල්ලා අහනවද? ඇයි සර් වයිඩ් එකක් දුන්නේ කියලා. මම දකින වෙලාවට දෙන දේ වෙනස් කරන්න කාටවත් බැහැ. ඕනෑම විනිසුරුවරයකුට වැඩ කරද්දී වැරැදි සිද්ධ වෙනවා. හැබැයි මම තමයි වැරැදි අඩුවෙන්ම කරන පුද්ගලයා. ඒකනේ මම ලෝකෙන්ම අංක එක වෙලා තියෙන්නේ. ඔය වගේ වැරැදිවලට කියන්නේ ජජ්මෙන්ටල් එර  කියලයි. දැන් බලන්න පන්දු යවන්නකු නෝ බෝල් එකක් දාපු වෙලාවක ඒක නෝ බෝල් එකක් වශයෙන් සටහන් කිරීමට මම අපොහොසත් වුණොත් ඒකත් වැරැදියි. ඒ කියන්නේ ක්‍රීඩකයකු සීමා ඉර ඉක්මවා කකුල පෑගුණ අවස්ථාවේදීම අපි එය නෝ බෝල් කියලා ක්ෂණිකයෙන්ම සංඥා කළ යුතුයි. බෝලේ පිතිකරුවාට ලැබුණට පස්සේ ඒක නෝ බෝල් කියලා සංඥා කළොත් වැරැදියි. ඒ වගේ වැරැද්දක් තමයි මෙතැනත් වෙලා තියෙන්නේ. සාමාන්‍යයෙන් ප්‍රධාන විනිසුරුවරයා දෙන තීරණයක් අනෙක් විනිසුරුවරයාගෙන් අහන්න ඕන නැහැ. ඒත් මම මරේගෙන් ඇහුවා ‘මරේ ඔයා මොකද හිතන්නේ මේ ගැන කියලා. එයත් කිව්වේ 100%ක් ෂුවර් ඒ දෙන්නා ක්‍රීස් කළා කියලා. (සීමාව සටහන් කළා කියලා) තව වෙන මොනවද මම කරන්න ඕන. මම පෞද්ගලිකවම හිතනවා ඒ අවස්ථාවේදී මම ගත්ත තීරණය හරි කියලා. ඒ අවස්ථාවේදී කරන්න පුළුවන් හොඳම දේ තමයි අපි කළේ. අද වෙනකම් නවසීලන්ත ක්‍රීඩකයකු තියා නවසීලන්තයේ කිසිම කෙනෙක් මේ සම්බන්ධයෙන් මමත් එක්ක කතා කරලා නැහැ.

තරගයෙන් පසුව තරග තීරකවරයා ලෙස කටයුතු කළ රන්ජන් මඩුගල්ලේ මහත්මයා මේ ගැන ඔබෙන් විමසීමක් කළාද?ඒ මහත්මයා මගෙන් අහන්නේ මොනවද? සමහර වෙලාවට තරගයකදී අපි වයිඩ් තුන හතරක් දෙනවා. ඇයි වයිඩ් දුන්නේ කියලා එයා මගෙන් අහන්නේ නැහැ. කොහොම වුණත් මම වැරැද්දක් කරලා තියෙනවා කියන ඔය සයිමන් ටෝෆල් කියන විනිසුරුවරයා අයි.සී.සී.යෙන් එළවලා තියෙන කෙනෙක්. එයා දැන් අයි.සී.සී.ය සමඟ කිසි සම්බන්ධයක් නැහැ. එයා කියවලා තියෙන්නේ නීති පොතේ භාගයක් වෙන්න ඇති. හැබැයි මම ඔය නීති පොත සම්පූර්ණයෙන්ම කියවලා තියෙනවා. මම දන්නෙ නැති කෙනෙක් වගේ වැඩ කරන්නෙ නැහැ. එහෙම කරනවා නම් මම ලෝක කුසලාන තරගාවලියක අවසන් මහා තරගයක විනිසුරුවරයකු විදියට දාවිද? අනිත් එක මම වගේ කළු ජාතිකයකුට අවුරුදු තුනක්ම ලෝකෙ අංක එක ලබා දේවිද? තරග තීරක ලෙස කටයුතු කළ රංජන් මහත්මයා කරන්නේ වෙනම රාජකාරියක්. එයා කවදාවත් අපි දුන්න තීරණයක් ගැන අහන්නෙත් නැහැ. අහලත් නැහැ. අදටත් මම කියන්නේ මම ගත්තු තීරණය හරි. ඒත් අපේ අය මේ පිළිබඳව මෙච්චර එළවන්නේ ඇයි කියලා මට හිතාගන්න බැහැ. මේ හැම මඩ ප්‍රහාරයක්ම ගහන්නේ මම ශ්‍රී ලාංකිකයෙක් නිසාද? ඊයේ පෙරේදා දවසක මම මගේ බිරියව ගේන්න එයාර්පෝට් එකට ගියාම අපේ අය අහපු දේවල් දැක්කහම ලංකාව ගැන කනගාටුවක් දැනෙනවා. වෙලාවක හිතෙනවා ලංකාවෙන් යන්න. ඒත් මම හැමදාමත් ලංකාව වෙනුවෙන් පෙනී සිටින ලංකාවට ආදරය කරන කෙනෙක් නිසා ඒකත් කරන්න අමාරුයි. අද මම වෙන රටක හිටිය නම් මම හිතන්නේ නැහැ අපේ අය මේ ගැන කතා කරයි කියලා. මම ශ්‍රී ලාංකිකයෙක් නිසා කතා කරනවා එහෙම නේද? මට මේ ගැන මෙයට වඩා කියන්න පුළුවන්. ඒත් මට කතා කරන්න පුළුවන් සීමාවක් තියෙනවා” යැයි සඳහන් කිරීම තුළ ඔහුට කීමට බොහෝ දේ ඇති බව වැටහුණද මේ කරුණු කාරණා ප්‍රමාණවත් වූ හෙයින් ඔහුගෙන් සමුගතිමි.කෙසේ නමුත් 1996 ලෝක කුසලාන ක්‍රිකට් තරගාවලියේදී ශ්‍රී ලංකා කණ්ඩායමේ ‘උනන්දුවා’ යන සුරතල් නාමයෙන් මුලු ලෝකයක්ම දැන හැඳිනගත් කුමාර ධර්මසේන යන ශ්‍රී ලාංකිකයා කරනු ලබන සේවය ඇගයීම විනා ඔහුට ‘මඩ’ ගසා ඔහුගේ ගමන නතර කිරීමට උත්සාහ ගැනීම ශ්‍රී ලාංකිකයකු වශයෙන් අප අපටම කරගන්නා මහත් විනාශයක් වනු ඇති බව කිව යුතුමය.
විචිත්‍ර වීරසිංහ

හැලීමේ හේතුව හෙළිවේ

බංග්ලාදේශයට එරෙහිව මේ මස අවසානයේ ශ්‍රී ලංකාවේදී පැවැත්වෙන තරග තුනකින් සමන්විත එක්දින ක්‍රිකට් තරගාවලියට සහභාගි වීම සඳහා නම් කළ 24 දෙනකුගෙන් යුත් ශ්‍රී ලංකා සංචිතයෙන් ලෝක කුසලාන තරගාවලියට සහභාගි වූ මිලින්ද සිරිවර්ධන, සුරංග ලක්මාල්, ජෙෆ්රි වැන්ඩසේ සහ ජීවන් මෙන්ඩිස් යන ක්‍රීඩකයන් ඉවත්කර තිබේ. ලෝක කුසලාන තරගාවලියේ ස්ථානය අහිමිවීම පිළිබඳව දැඩි කථා බහට ලක්වූ පිට දඟ පන්දු යවන අකිල ධනංජය මෙම සංචිතයට ඇතුළත්ව සිටියි. කෙසේ වෙතත් හිටපු නායකයකු වන දිනේෂ් චන්දිමාල් මෙම සංචිතයට ඇතුළත්ව නැත.චන්දිමාල් ශ්‍රී ලංකා ‘ඒ’ පිලේ ඉන්දිය සංචාරයෙන් ඉවත්ව සිටීම නිසා මෙම සංචිතයට ඇතුළත් කර නොමැති බව දැනගන්නට තිබේ. ලෝක කුසලාන තරගාවලිය අතරතුරදී ශ්‍රී ලංකා ‘ඒ’ සහ නැඟීඑන කණ්ඩායම නියෝජනය කරමින් දස්කම් දැක්වූ ක්‍රීඩකයෝ රැසක් මෙම සංචිතයට ඇතුළත්ව සිටිති. නිරෝෂන් දික්වැල්ල, ධනුෂ්ක ගුණතිලක සහ ලක්‍ෂාන් සඳකැන් නැවත එක්දින සංචිතයට කැඳවා තිබේ. ශ්‍රී ලංකාව සහ බංග්ලාදේශය අතර පළමු එක්දින තරගය මේ මස 26 වැනිදා කොළඹ ආර්. ප්‍රේමදාස ක්‍රීඩාංගණයේදී පැවැත්වීමට නියමිතය. ශ්‍රී ලංකා එක්දින සංචිතය:දිමුත් කරුණාරත්න (නායක), අවිශ්ක ප්‍රනාන්දු, ළහිරු තිරිමාන්න, කුසල් මෙන්ඩිස්, කුසල් පෙරේරා, ඇන්ජලෝ මැතිව්ස්, ධනංජය ද සිල්වා, ඉසුරු උදාන, තිසර පෙරේරා, නුවන් ප්‍රදීප්, ලසිත් මාලිංග, ඕෂද ප්‍රනාන්දු, ඇන්ජලෝ පෙරේරා, කසුන් රාජිත, වනිඳු හසරංග, ලක්‍ෂාන් සඳකැන්, අකිල ධනංජය, නිරෝෂන් දික්වැල්ල, අමිල අපෝන්සු, ළහිරු මධුසංඛ, ළහිරු කුමාර, ධනුෂ්ක ගුණතිලක, ෂෙහාන් ජයසූරිය සහ දසුන් ශානක

බෙන් ස්ටොක්ස් හා කේන් විලියම්සන් අතර සටනක්

වසරේ ‘‘නවසීලන්ත ජාතිකයාට‘‘ හිමි විශිෂ්ඨතම සම්මානය සඳහා එංගලන්ත ජාතික ක්‍රිකට් කණ්ඩායමේ තුන් ඉරියව් ක්‍රීඩක බෙන් ස්ටොක් නිර්දේශ කර තිබේ.. තරමක් පුදුමය දනවන සුළුපුවතක් වුවත් බෙන් ස්ටොක්ස් නවසීලන්ත ජාතිකයෙකි.ඔහු උප ලැබුවේ නවසීලන්තයේ ක්‍රයිස්චර්ච් නගරයේය.පසුව ඔහුගේ පවුලේ උදවියද සමගින් එංගලන්තයට පැමිණ වී තිබේ.ඉකුත් දා පැවැති ලෝක කුසලාන ක්‍රිකට් තරගාවලියේ අවසන් මහා තරගයේදී නවසීලන්ත කණ්ඩායමට ජයග්‍රහණය අහිමි කරමින් කුසලානය එංගලන්තයට දිනා දීමට බෙන් ස්ටොක් කැපී පෙනෙන දායකත්වයක් ලබා දුන්නේය.නවසීලන්තයේ උපත ලැබූ වයස අවුරුදු 15ට වැඩි ඕනෑම අයෙක්, වසරේ නවසීලන්ත ජාතිකයාට හිමි විශිෂ්ඨතම සම්මානය සඳහා නිර්දේශ වෙයි.මීට අමතරව නවසීලන්ත ක්‍රිකට් නායක කේන් විලියම්සන් ද මෙම සම්මානය සඳහා නිර්දේශ වී තිබීම විශේෂත්වයකි.

බංග්ලාදේශ කණ්ඩායම ලංකාවට ගහන හැටි ප්‍රසිද්ධියේ කියයි

මේ මස 26 වැනිදා සිට 31 වැනිදා දක්වා පැවැත්වෙන ශ්‍රී ලංකා බංග්ලාදේශ ක්‍රිකට් තරගාවලියේ දී ශ්‍රී ලංකා කණ්ඩායමට හොඳ අභියෝගයක් ලබා දීමට හැකි බව බංග්ලාදේශ ක්‍රිකට් කණ්ඩායමේ තුන් ඉරියව් ක්‍රීඩක මොසදික් හුසේන් පවසා ඇත.ශ්‍රී ලංකා කණ්ඩායම හා බංග්ලාදේශ කණ්ඩායම අතර මේ දක්වා පවත්වා තිබෙන එකඳු මට්ටමේ හෝ ජාත්‍යන්තර ක්‍රිකට් තරගාවලියක් බංග්ලාදේශ කණ්ඩායම ජයග්‍රහණය කර නොමැති නමුත් මේ වතාවේ දී ඔවුන්ට එය සිදු කළ හැකි බවට ඔවුන් දැඩි විශ්වාසයකින් පසුවෙයි.“මම හිතන්නේ අපිට මේ තරගාවලියේ දී ශ්‍රී ලංකාව පරාජය කරන්න අපිට පුළුවන් කියලයි. මොකද අපේ කණ්ඩායම පහුගිය කාලය පුරාවටම පිතිකරණයෙන්, පන්දු යැවීමෙන් ඉතාමත් හොඳ දස්කම් පෙන්නුවා. ඒක නිසා අපිට මේ තරගාවලියේ දී ශ්‍රී ලංකා කණ්ඩායම හොඳ අභියෝගයක් දෙන්න පුළුවන් වෙයි කියලා ලොකු විශ්වාසයක් තිබෙනවා.” යැයි 23 හැවිරිදි මොසදික් හුසේන් පවසා ඇත.ජාත්‍යන්තර ක්‍රිකට් පිටිය තුල මෙම කණ්ඩායම් දෙක මේ දක්වා එක්දින ක්‍රිකට් තරගාවලි 7කට මුහුණ දී තිබෙන අතර ඉන් තරගාවලි 6කම ජය තහවුරු කරගෙන ඇත්තේ ශ්‍රී ලංකා කණ්ඩායමයි. කෙසේ නමුත් බංග්ලාදේශ කණ්ඩායම ශ්‍රී ලංකා කණ්ඩායම සමඟ පමණක් සඳහා තරග වැදීම වෙනුවෙන් ශ්‍රී ලංකාවට පැමිණි අවසන් අවස්ථාවේ දී එම තරගාවලිය තරග 1-1ක් ලෙස සම වීමෙන් අවසන් වූයේය. 2019 ලෝක කුසලාන ක්‍රිකට් තරගාවලියේ දී බංග්ලාදේශ තුන් ඉරියව් ක්‍රීඩක ශකිබ් අල් හසන් පිතිකරණයෙන් ලකුණු 606ක් හා පන්දු යැවීමෙන් කඩුලු 11ක් දවාගෙන කැපී පෙනෙන තුන් ඉරියව් දස්කම් දැක්වීමට සමත් විය. එහි දී ඔහු 86.57ක දල ලකුණු ලබා ගැනීමේ සාමාන්‍යයක් රඳවා ගෙන පිතිකරණයේ නිරත වූ අතර ඒ සඳහා ශතක දෙකක් හා අර්ධ ශතක 5ක් අන්තර්ගත වන ලදි. නමුත් ලෝක කුසලානයට පසුව ශකිබ් අල් හසන් තමා හට යම් විවේකයක් අවශ්‍ය බව පුද්ගලිකව බංග්ලාදේශ ක්‍රිකට් බලධාරීන්ට දැනුම් දී තිබූ නිසාවෙන් බංග්ලාදේශ ක්‍රිකට් තේරීම් කමිටුව ශ්‍රී ලංකා තරග සංචාරයේ දී ඔහුව විවේක ගැන්වීමට තීරණය කර ඇත.

එසේම බංග්ලාදේශ ලෝක කුසලාන සංචිතයේ සිටි තවත් දක්ෂ මැදපෙළ පිතිකරුවෙක් හා කඩුලු රකින ක්‍රීඩක ලිටන් දාස් මේ මස 28 වැනිදා යුග දිවියට එළඹෙන නිසාවෙන් ඔහු ද මේ සංචිතය සඳහා නම් කර නොමැත.“මහමදුල්ලා ලෝක කුසලානයේ දී පන්දු යැවුවේ නැති එක (උරහිසේ ආබාධය නිසා) අපිට ලොකු පාඩුවක් වුනා. ඒක නිසා මට හැම තරගයක දී ම පන්දු යවන්නත් සිදු වුනා. වෙනදට මහමදුල්ලා පන්දුවාර 10ක් වගේ හැම තරගයේම දානවා. ඒ වගේ තරගවල දී මම යවන්නේ පන්දුවාර 5-6ක් වගේ.මම පිතිකරණ තුන් ඉරියව් ක්‍රීඩකයෙක්. හැබැයි මට දැන් තේරුණා පන්දු යවන්නෙක් ලෙසත් මට ලොකු දෙයක් කරන්න පුළුවන් කියලා. ඒක මගේ තුන් ඉරියව් ක්‍රිකට් තරග රටාවටත් ලොකු සවියක්. ශකිබ් ශ්‍රී ලංකා තරග සංචාරයට නැති නිසා ඒ තරගාවලියේ දීත් පන්දු යවන්නෙක් ලෙසත් මගෙන් ලොකු දෙයක් කණ්ඩායම අපේක්ෂා කරනවා. කොහොම වුනත් මගේ කණ්ඩායම මගෙන් ඉල්ලන ඕනම දෙයක් තරගය තුල දී මම කරන්න කැමැත්තෙන් ඉන්නවා. මම දැනටමත් ඒ සඳහා අවශ්‍ය සැලසුම් හදලා තියෙන්නේ.” යැයි එම හමුවේ දී මාධ්‍ය වෙත අදහස් දැක්වූ හුසේන් පවසා තිබේ.
අංක 7 ස්ථානයේ පිතිකරණයේ නිරත වන හුසේන් සිය පිතිකරණ ස්ථානය පිළිබඳව දැරුවේ මෙවන් අදහසක්,“මම හිතන විදිහට එළඹෙන ශ්‍රී ලංකා තරග සංචාරයේ දීත් ලෝක කුසලාන ක්‍රිකට් තරගාවලියේ දී ක්‍රීඩා කළා වගේ අංක 7 ස්ථානයේ ක්‍රීඩා කරන්න ලොකු ඉඩක් තිබෙනවා. මොකද අපේ කණ්ඩායමේ දැනට තිබෙන සංයුතිය කඩන්න මට කිසිම අවශ්‍යතාවයක් නැහැ. එය තමයි මට පිතිකරණයේ නිරත වෙන්න තියෙන හොඳම තැන කියලා මට ලොකු විශ්වාසයක් තියෙනවා. මේ වගේ තැනක පිතිකරණයේ නිරත වෙනකොට අඩු පන්දු ප්‍රමාණයක් තුල වැඩි ලකුණු ප්‍රමාණයක් ගන්න පුළුවන් හැකියාව ඒ පිතිකරුවාට තියෙන්න ඕනේ. ඒ වගේම අසීරු අවස්ථාවන් වලදී ඉනිම ගොඩනැංවීමේ හැකියාවත් තියෙන්න ඕනේ. ඒ දේවල් සලකලා බලලා මගේ අඩුපාඩු හදාගෙන කණ්ඩායමේ ප්‍රගතියට ලොකු දායකත්වයක් දක්වන්න මම බලාපොරොත්තුවෙන් ඉන්නවා.” යැයි හුසේන් අවසන් ලෙස පවසන ලදි.

එක්දින තරග 3කින් සමන්විත මෙම තරගාවලිය සඳහා බංග්ලාදේශ කණ්ඩායම ලබන 23 වැනිදා ශ්‍රී ලංකාවට පැමිණීමට නියමිතව තිබෙන අතර ඔවුන් දින 10ක කාලයක් ශ්‍රී ලංකාවේ රැඳී සිටිනු ඇත. ලබන මස 26, 28 සහ 31 යන දිනයන්හි පැවැත්වීමට නියමිත මෙම තරග තුනම දිවා/රාත්‍රි තරග වශයෙන් පැවැත්වේ.තරග කාලසටහන – ජූලි 23 – පුහුණු එක්දින ක්‍රිකට් තරගය කොළඹ පී. සරා ඕවල් ක්‍රිකට් පිටියේ දී,ජූලි 26 – පළමු එක්දින තරගය කොළඹ ආර්. ප්‍රේමදාස ක්‍රීඩාංගණයේ දී,ජූලි 28 – දෙවැනි එක්දින තරගය කොළඹ ආර්. ප්‍රේමදාස ක්‍රීඩාංගණයේ දී,ජූලි 31 – තෙවැනි එක්දින තරගය කොළඹ ආර්. ප්‍රේමදාස ක්‍රීඩාංගණයේ දී

පොතට එකතුවුණු අලුත්ම

ජාත්‍යන්තර ක්‍රිකට් කවුන්සිලයේ වාර්ෂික සැසිවාරය ඊයේ ලන්ඩන් නුවරදී නිමා වුනා.එහිදී ක්‍රිකට් කමිටුව විසින් ලබාගත් නීති සංශෝධන කිහිපයකයට අනුමැතිය හිමිවුණා.ජාත්‍යන්තර ක්‍රිකට් කවුන්සිලයේ සභාපති ශාශාන්ක් මනොහාර් ගේ ප්‍රධානත්වයෙන් පැවති මෙම සැසිවාරයට ටෙස්ට් තත්වය හිමි සියලු රටවල ක්‍රිකට් සභාපතිවරු එක්ව සිටියා.එහිදී ක්‍රිකට් නීති කිහිපයක් වෙනස් කිරීම සඳහා අනුමැති හිමිවූ අතර තරඟයක් අතරතුර දරුණු ආබාධයකට ලක්වන ක්‍රීඩකයෙක් වෙනුවට වෙනත් ක්‍රීඩකයෙකු ආදේශ කිරීමට ගෙනා යෝජනාව ක්‍රිකට් ක්‍රීඩාවට නව අත්දැකීමක් වනු ඇති.මේ අනුව වෛද්‍යවරුන්ගේ කමිටුවෙන් සහ තරඟ තීරකවරයාගේ අනුමැතිය ඇතිව ආබාධයකට ලක්වන ක්‍රීඩකයෙක් වෙනුවට වෙනත් ක්‍රීඩකයෙකු කණ්ඩායමට ආදේශ කිරීමට හැකිවන අතර මෙම සංශෝධිත නීතිය පළමුව පළමු පෙළ ක්‍රිකට් තරඟ සඳහා පමණක් භාවිත කිරීමට තීරණය කළා.ඒ අනුව ආදේශිත නව ක්‍රීඩකයාට පිතිකරණයේ අවස්ථාව මෙන්ම පන්දු යැවීමේ අවස්තාවද හිමිවණු ඇති.ලබන මස පළමුවනදා සිට පළමුපෙළ තරඟ සඳහා මෙලෙස ක්‍රීඩකයන් ආදේශ කිරීමට හැකිවනු ඇති.මේ අතර අඩු පන්දුවාර වේගය වසරක් තුළ තරඟ දෙකකදී රඳවාගැනීමේ වරදට නායකයාට පැනවූ තරඟ තහනම තවදුරටත් ක්‍රියාත්මක නොකිරීමට තීරණය කළා.ඒ සඳහා පැනවෙන දඩය මින් ඉදිරියට සෑම ක්‍රීඩකයෙකුටම සම සේ බෙදී යනු ඇති.එළඹෙන ටෙස්ට් ලෝක ශූරතාවලියේදී අඩු පන්දුවාර වේගයක් රඳවාගතහොත් තරඟය අවසානයේ ඔවුන්ට ලැබෙන ප්‍රසාද ලකුණු දෙක බැගින් අඩු කිරීමටද අයිසිසියේ අනුමැතිය හිමිවුණා.

එහෙම කරන්න එපා කියලත් කියලා

එංගලන්ත කණ්ඩායමේ සුපිරි වේග පන්දු ක්‍රීඩක ජේම්ස් අන්ඩසන් කරපු ආන්දෝලනාත්මක ප්‍රකාශයක් ගැන මේ වෙනකොට විශාල කතා බහකට ලක් වෙලා තියෙනවා.ලෝක කුසලානයේදී එංගලන්තයේ ජයග්‍රහණය වෙනුවෙන් ගොඩක් මහන්සි වුණු බෙන් ස්ටෝක් පිටිය අවසන් පන්දුවාරයේදී කරපු කවුරුත් නොදන්න වැඩක් ගැන තමා ඔහු කියලා තියෙන්නේ.හැමෝම විවේචනය කළ බෙන් ස්ටොක් දෙවෙනි ලකුණ වෙත කඩුල්ල අතර දිව යද්දී පිත්තේ වැදිලා ගිය හතරේ පහර ලකුණු පුවරුවෙන් ඉවත් කරන්න කියලා විනිසුරු කුමාර ධර්මසේනගෙන් බෙන් ස්ටොක් ඉල්ලලා තියෙනවා කියලා ජේම්ස් අන්ඩසන් කියලා තියෙනවා. නමුත් විනිසුරු එය ප්‍රතික්ෂේප කරලා ලකුණු හයක් ලබා දුන්නා. සමහර අය කියනවා ලකුණු පහක් දෙන්න තිබුණේ කියලා.කොහොම වුණත් බෙන් කියන්නේ හොඳ ක්‍රීඩකයෙක් කියලා තමා පේන්නේ.

එන සංචිතය මෙන්න

ශ්‍රී ලංකා තරඟ සංචාරයට එක්වන බංගලාදේශ ක්‍රිකට් සංචිතය අද නම්කර තිබෙනවා.එළඹෙන 26 වැනිදා සිට 31 වනදා දක්වා පැවැත්වෙන මෙම තරඟාවලියට එක්දින තරඟ 3 ක් ඇතුලත්.එම තරඟ කොළඹ ආර්. ප්‍රේමදාස ක්‍රීඩාංගණයේ දී දිවා රාත්‍රී තරඟ ලෙස පැවැත්වීමටයි නියමිතව ඇත්තේ.මෙම තරඟ සංචාරයේද බංගලාදේශ කණ්ඩායම මෙහෙයවීමේ වගකීම පැවරී ඇත්තේ වේගපන්දු යවන ක්‍රීඩක මෂ්රෆි මෝර්ටාසාටයි.මේ අතර මෙම සංචිතයට බංගලාදේශ කණ්ඩායමේ සුපිරි තුන් ඉරියව් ක්‍රීඩක ශකිබ් අල් හසන් එක් නොවීම විශේෂත්වයක්.ඔහු විසින් සිදුකළ පෞද්ගලික ඉල්ලීමකට අනුව මෙලෙස ඔහු ශ්‍රී ලංකා තරඟ සංචාරයෙන් විවේක ගන්වා ඇති බවයි විදෙස් මාධ්‍ය වැඩිදුරටත් වාර්තා කරන්නේ.ක්‍රීඩකයන් 15 දෙනෙකුගෙන් සමන්විත බංගලාදේශ ක්‍රිකට් සංචිතය පහතින්.මෂ්රෆි මෝර්ටාසා (නායක),තමිම් ඉක්බාල්,මුෂ්ෆිකර් රහීම්,සබීර් රෙහ්මාන්,සෞම්‍ය සර්කාර්,මොහොමඩ් මිතුන්,මහමදුල්ලා රියාද්,මොසදික් හුසේන්,රුබෙල් හුසේන්,මස්ටෆිසුර් රෙහ්මාන්,මෙහෙදි හසන් මිරාස්,මොහොමඩ් සයිෆුදීන්,එනමුල් හක්,ටයිජුල් ඉස්ලාම්

නවසීලන්තයට මුල්තැන

ජාත්‍යන්තර ක්‍රිකට් කවුන්සිලය විසින් මෙවර ලෝක කුසලාන තරඟාවලියේ දක්ෂතා අනුව ලෝක කුසලාන කණ්ඩායමක් ප්‍රකාශයට පත්කර තිබෙනවා.එම කණ්ඩායමට මෙවර ලෝක කුසලාන තරඟාවලියට එක්වූ විවිධ කණ්ඩායම්වල සුපිරි ක්‍රීඩකයන් එක්කර තිබීම විශේෂත්වයක්.එම කණ්ඩායමේ නායකයා ලෙසින් ඔවුන් නම්කර ඇත්තේ නවසීලන්ත නායක කේන් විලියම්සන් වීම විශේෂත්වයක්.තවත් නවසීලන්ත ක්‍රීඩකයන් දෙදෙනෙකු ඒ සඳහා නම්කර ඇති අතර ඔවුන් වන්නේ ලුකී ෆර්ගියුසන් සහ ට්‍රෙන්ට් බෝල්ට්.මෙම කණ්ඩායමේ ආරම්භක පිතිකරුවන් ලෙස නම්කර තිබෙන්නේ ඉන්දීය ක්‍රීඩක රෝහිත් ශර්මා සමඟ එංගලන්ත ක්‍රීඩක ජේසන් රෝයි.ජේසන් රොයිට අමතරව තවත් එංගලන්ත ක්‍රීඩකයන් තිදෙනෙකුට එම කණ්ඩායමට ඔවුන් නම්කර තිබෙනවා.එම ක්‍රීඩකයන් වන්නේ පිළිවෙලින් ජෝ රූට්, බෙන් ස්ටෝක්ස්, ආර්චර්.රෝහිත් ශර්මාට අමතරව ඉන්දීය ක්‍රීඩක ජස්ප්‍රිට් බුම්රා ද මෙම කණ්ඩායමට ඇතුලත්.එම කණ්ඩායමේ ඕස්ට්‍රේලියානු ක්‍රීඩක ඇලෙක්ස් කඩුලු රකින්නා ලෙස නම්කර ඇති අතර ඕස්ට්‍රේලියානු ක්‍රීඩක මිචෙල් ස්ටාක් ද එම කණ්ඩායමට ඇතුලත්.මීට අමතරව බංගලාදේශ කණ්ඩායමේ සුපිරි ක්‍රීඩක ෂකිබ් අල් හසන් ට ද එහි ස්ථානයක් වෙන්කර තිබෙනවා.කෙසේ වෙතත් මෙම කණ්ඩායමට කිසිදු ශ්‍රී ලාංකික ක්‍රීඩකයෙකු ඇතුලත් නොවීම විශේෂත්වයක්.