එන සංචිතය මෙන්න

ශ්‍රී ලංකා තරඟ සංචාරයට එක්වන බංගලාදේශ ක්‍රිකට් සංචිතය අද නම්කර තිබෙනවා.එළඹෙන 26 වැනිදා සිට 31 වනදා දක්වා පැවැත්වෙන මෙම තරඟාවලියට එක්දින තරඟ 3 ක් ඇතුලත්.එම තරඟ කොළඹ ආර්. ප්‍රේමදාස ක්‍රීඩාංගණයේ දී දිවා රාත්‍රී තරඟ ලෙස පැවැත්වීමටයි නියමිතව ඇත්තේ.මෙම තරඟ සංචාරයේද බංගලාදේශ කණ්ඩායම මෙහෙයවීමේ වගකීම පැවරී ඇත්තේ වේගපන්දු යවන ක්‍රීඩක මෂ්රෆි මෝර්ටාසාටයි.මේ අතර මෙම සංචිතයට බංගලාදේශ කණ්ඩායමේ සුපිරි තුන් ඉරියව් ක්‍රීඩක ශකිබ් අල් හසන් එක් නොවීම විශේෂත්වයක්.ඔහු විසින් සිදුකළ පෞද්ගලික ඉල්ලීමකට අනුව මෙලෙස ඔහු ශ්‍රී ලංකා තරඟ සංචාරයෙන් විවේක ගන්වා ඇති බවයි විදෙස් මාධ්‍ය වැඩිදුරටත් වාර්තා කරන්නේ.ක්‍රීඩකයන් 15 දෙනෙකුගෙන් සමන්විත බංගලාදේශ ක්‍රිකට් සංචිතය පහතින්.මෂ්රෆි මෝර්ටාසා (නායක),තමිම් ඉක්බාල්,මුෂ්ෆිකර් රහීම්,සබීර් රෙහ්මාන්,සෞම්‍ය සර්කාර්,මොහොමඩ් මිතුන්,මහමදුල්ලා රියාද්,මොසදික් හුසේන්,රුබෙල් හුසේන්,මස්ටෆිසුර් රෙහ්මාන්,මෙහෙදි හසන් මිරාස්,මොහොමඩ් සයිෆුදීන්,එනමුල් හක්,ටයිජුල් ඉස්ලාම්

නවසීලන්තයට මුල්තැන

ජාත්‍යන්තර ක්‍රිකට් කවුන්සිලය විසින් මෙවර ලෝක කුසලාන තරඟාවලියේ දක්ෂතා අනුව ලෝක කුසලාන කණ්ඩායමක් ප්‍රකාශයට පත්කර තිබෙනවා.එම කණ්ඩායමට මෙවර ලෝක කුසලාන තරඟාවලියට එක්වූ විවිධ කණ්ඩායම්වල සුපිරි ක්‍රීඩකයන් එක්කර තිබීම විශේෂත්වයක්.එම කණ්ඩායමේ නායකයා ලෙසින් ඔවුන් නම්කර ඇත්තේ නවසීලන්ත නායක කේන් විලියම්සන් වීම විශේෂත්වයක්.තවත් නවසීලන්ත ක්‍රීඩකයන් දෙදෙනෙකු ඒ සඳහා නම්කර ඇති අතර ඔවුන් වන්නේ ලුකී ෆර්ගියුසන් සහ ට්‍රෙන්ට් බෝල්ට්.මෙම කණ්ඩායමේ ආරම්භක පිතිකරුවන් ලෙස නම්කර තිබෙන්නේ ඉන්දීය ක්‍රීඩක රෝහිත් ශර්මා සමඟ එංගලන්ත ක්‍රීඩක ජේසන් රෝයි.ජේසන් රොයිට අමතරව තවත් එංගලන්ත ක්‍රීඩකයන් තිදෙනෙකුට එම කණ්ඩායමට ඔවුන් නම්කර තිබෙනවා.එම ක්‍රීඩකයන් වන්නේ පිළිවෙලින් ජෝ රූට්, බෙන් ස්ටෝක්ස්, ආර්චර්.රෝහිත් ශර්මාට අමතරව ඉන්දීය ක්‍රීඩක ජස්ප්‍රිට් බුම්රා ද මෙම කණ්ඩායමට ඇතුලත්.එම කණ්ඩායමේ ඕස්ට්‍රේලියානු ක්‍රීඩක ඇලෙක්ස් කඩුලු රකින්නා ලෙස නම්කර ඇති අතර ඕස්ට්‍රේලියානු ක්‍රීඩක මිචෙල් ස්ටාක් ද එම කණ්ඩායමට ඇතුලත්.මීට අමතරව බංගලාදේශ කණ්ඩායමේ සුපිරි ක්‍රීඩක ෂකිබ් අල් හසන් ට ද එහි ස්ථානයක් වෙන්කර තිබෙනවා.කෙසේ වෙතත් මෙම කණ්ඩායමට කිසිදු ශ්‍රී ලාංකික ක්‍රීඩකයෙකු ඇතුලත් නොවීම විශේෂත්වයක්.

ධර්මසේනගේ ලකුණු 6 ගැන, සංවාදයක්

ලෝක කුසලාන ක්‍රිකට් තරගාවලියේ අවසන් තරඟයේ වාසිය එංගලන්තයට නතුවීමේ ප්‍රධාන හැරවුම් ලක්ෂය වූ අවසන් පන්දු වාරයේදී එංගලන්ත ක්‍රීඩක බෙන් ස්ටොක්ස්ගේ පිත්තේ වැදී හතරේ සීමාව වෙත ඇදී ගිය පන්දුවට ලකුණු 06ක් පිරිනැමීමේ සිදුවීම පිළිබඳ මේ වන විට දැඩි ආන්දෝලනාත්මක කථාබහක් ඇතිව තිබෙනවා.ජාත්‍යන්තර ක්‍රිකට් කවුන්සිල තරඟ නීති පද්ධතියේ සඳහන් වන්නේ පන්දු රකින්නෙකු යොමු කරන පන්දුවක් හතරේ සීමාව වෙත ඇඳී ගියහොත් එම ලකුණු 04ට අමතරව පන්දු රකින්නාගේ අතින් පන්දුව ගිලිහෙන අවස්ථාව වන විට පිතිකරුවන් සම්පූර්ණ කර තිබූ ලකුණු මුළු ලකුණු සංඛ්‍යාවට එක්වන බවයි.ඊට අමතරව පන්දු රකින්නාගේ අතින් ගිලිහෙන අවස්ථාවේ තවත් ලකුණක් කරා දිව යමින් සිටින පිතිකරුවන් දෙදෙනා එකිනෙකා පසුකර තිබුණොත් පමණක් එම ලකුණ ද මුළු ලකුණු සංඛ්‍යාවට එක්විය යුතු බව, එහි සඳහන් වනවා.කෙසේ වෙතත්, මාර්ටින් ගප්ටිල්ගේ අතින් පන්දුව ගිලිහෙන අවස්ථාවේ අදීල් රෂීඞ් සහ බෙන් ස්ටොක්ස් එක් ලකුණක් පමණක් සම්පූර්ණ කර තිබූ නමුත්, දෙවන ලකුණ සඳහා දිව යාම ආරම්භ කර තිබුණ ද, එකිනෙකා පසුකර තිබුණේ නැහැ.ඒ අනුව නීති ප්‍රකාරව ඔවුන්ට හිමි විය යුත්තේ ලකුණු 5ක් පමණයි.නමුත්, එම අවස්ථාවේ ප්‍රධාන විනිසුරු ලෙස කටයුතු කළ කුමාර් ධර්මසේන සිය අනෙක් විනිසුරු සගයන්ගේ මතය විමසීමෙන් පසු එංගලන්තයට ලකුණු 6ක් ලබා දුන්නා.හිටපු ක්‍රිකට් විනිසුරුවරයෙකු මෙන්ම, වර්තමානයේ මාලිබෝන් ක්‍රිකට් සමාජයේ නීති අංශයේ සාමාජිකයෙකු ද වන සයිමන් ටෝෆල් පෙන්වා දෙන්නේ එම අවස්ථාවේ වැඩිපුර ලකුණක් ලබාදීම මෙන්ම ඊළඟ පන්දුවට මුහුණදීමේ අවස්ථාව බෙන් ස්ටොක්ස්ට ලබාදීම ද විනිසුරුවන් අතින් සිදුවූ බරපතල වරදක් බවයි.යම් හෙයකින් විනිසුරුවන් නීතියට අනුව කටයුතු කළා නම් තරඟය ලකුණු සමවීමකින් අවසන් නොවී, නවසීලන්තය මේ වන විට ලෝක කුසලානයේ උරුමකරුවන් වීමට ඉතා ඉහළ අවස්ථාවක් තිබූ බව බොහෝ ක්‍රිකට් විචාරකයින් පෙන්වා දෙනවා.

මගේ ජීවිත කාලය පුරාම මම ඒ ගැන සමාව ඉල්ලනවා

නවසීලන්තය පරාජයට පත් කරමින් ක්‍රිකට් ලෝක කුසලාන අවසන් මහා තරගය ජයගැනීමට එංගලන්ත කණ්ඩායම ඊයේ (14) සමත්වුණා.එංගලන්තය මෙම ජයග්‍රහණය වාර්තා කරනු ලැබුවේ තරගයේදී ඔවුන් එල්ල කරනු ලැබූ හතරේ පහරවල් සංඛ්‍යාව නවසීලන්ත පිලට වඩා වැඩිවීම හේතුවෙන්.ලෝක කුසලාන ඉතිහාසයේ අවසන් මහා තරගයකදී මේ අයුරින් කණ්ඩායමක් ජයගත් පළමු අවස්ථාව ලෙස ඊයේ තරගය ඉතිහාසයට එක්වනවා.කාසියේ වාසිය දිනා පළමුවෙන් පන්දුවට පහරදුන් නවසීලන්ත කණ්ඩායම සිය පන්දු වාර 50 අවසානයේදී කඩුලු 08 ක් දැවී ලකුණු 241 ක් රැස් කළා.නවසීලන්ත කණ්ඩායම සිය පන්දු වාර 50 තුළදී හතරේ පහරවල් 14 ක් සහ හයේ පහරවල් 2 ක් එල්ල කරනු ලැබුවා.ලකුණු 242 ක ජයග්‍රාහී ඉලක්කයක් හඹා යාමට පිටියට පිවිසි එංගලන්ත පිතිකරුවන් සිය පන්දු වාර 50 අවසානයේදී සියලුදෙනා දැවී ලකුණු 241 ක් ලබාගනිමින් නවසීලන්තය රැස් කළ ලකුණු සංඛ්‍යාව සම කළා.එහිදී එංගලන්ත පිතිකරුවන් සිය ඉනිම තුළදී හතරේ පහරවල් 22ක් සහ හයේ පහර 2 ක් එල්ල කරනු ලැබුවා.කණ්ඩායම් දෙකම සම ලකුණු රැස් කිරීම හේතුවෙන් තරගයේ තීරණය ලබාගැනීම සඳහා සුපිරි පන්දු වාරයක් ක්‍රියාත්මක වූ අතර, පළමුවෙන් පන්දුවට පහරදුන් එංගලන්ත කණ්ඩායම එහිදී ලකුණු 15 ක් රැස් කළා.ලකුණු 16 ක ජයග්‍රාහී ඉලක්කයක් හඹායෑම සඳහා පිටියට පිවිසියේ නවසීලන්ත කණ්ඩායමේ ජිම් නීෂම් සහ මාටින් ගප්ටිල්.කෙසේ වෙතත් ජෝෆර් ආචර් විසින් යැවූ සුපිරි ඕවරයේ පළමු පන්දු 5 තුළදී ලකුණු 14 ක් ලබාගත් නවසීලන්ත පිතිකරුවන් යුගලය අවසාන පන්දුවේදී තරගය ජයග්‍රහණය සඳහා රැස් කිරීමට අවශ්‍යව තිබුණේ ලකුණු 2 ක් පමණයි.නමුත් අවසාන පන්දුවේදී මිඩ් විකට් කලාපයට පහරක් එල්ල කරමින් මාටින් ගප්ටිල් පළමු ලකුණ ලබාගෙන දෙවන ලකුණ කරා දිවයාමේදී ඔහුව දුවද්දී දවාගැනීමකට හසුකර ගැනීමට ජොස් බට්ලර් සමත්වුණා.ඒ අනුව සුපිරි පන්දු වාරයේදීද දෙපිලම ලබාගත් ලකුණු සංඛ්‍යාව සමවුණා.ජාත්‍යන්තර ක්‍රිකට් කවුන්සිලයේ නීතියට අනුව වැඩිම හතරේ පහරවල් සංඛ්‍යාවක් එල්ල කරනු ලැබූ එංගලන්ත කණ්ඩායම මෙවර ලෝක කුසලානය දිනාගත් කණ්ඩායම ලෙස ප්‍රකාශයට පත් කරනු ලැබුවේ ඉන් අනතුරුවයි.1975 වසරේ ආරම්භ කරනු ලැබූ ලෝක කුසලාන එක්දින ක්‍රිකට් තරග ඉතිහාසයේ ගතවූ වසර 44 තුළදී අවසන් මහා තරගයක තීරණය ලබාගැනීම සඳහා සුපිරි පන්දු වාරයක අවස්ථාව දක්වා පැමිණි පළමු අවස්ථාව මෙය වන අතර, ඉන්ද තීරණයක් ලබාගැනීමට නොහැකිවීම හේතුවෙන් වැඩිම හතරේ පහරවල් සංඛ්‍යාවක් එල්ල කරනු ලැබූ කණ්ඩායම ලෝක ශූරයින් බවට පත්වූ අවස්ථාව ලෙස ඊයේ තරගය ඉතිහාසයට එක්වනවා.

තරඟාවලියේ වීරයා ලෙස නවසීලන්ත පිලේ නායක කේන් විලියම්සන් සම්මානයට පාත්‍රවුණා.තරගයේ වීරයා ලෙස බෙන් ස්ටොක්ස් නම් කරනු ලැබූවා.මේ අතර තරඟයේ සිදුවූ එක් සිදුවීමක් පිළිබදව තමන් කණගාටුවන බව බෙන් ස්ටොක්ස් පවසනවා.එංගලන්ත ඉනිමේ අවසන් පන්දුවාරයේ සිව්වන පන්දුවේදී මෙම සිදුව්ම සිදුවන අතර පන්දු රකින ක්‍රීඩකයෙක් විසින් නවසීලන්ත කඩුලු රකින ක්‍රීඩකයා වෙත යොමු කරන පන්දුව එම අවස්ථාවේ කඩුලු අතර දුවමින් සිටි බෙන් ස්ටොක්ස්ගේ ශරීරයේ වැදී හතරේ සීමාව වෙත ඇදී යනවා.ඒ අනුව එංගලත්න පිලට අතිරේක ලකුණු 04ක් එක්වුණා.එම අවස්ථාවේ එංගලන්ත පිළට පන්දු 03ක් තුල ලකුණු 09ක් අවශ්‍යව තිබූ අතර එම සිදුවීම සිදුවන අවස්ථාවේ පිතිකරුවන් දෙදෙනා කඩුලු අතර දිවයමින් ලකුණු 02ක් රැස්කරගෙන තිබූ අතර පන්දුව බෙන් ස්ටොක්ස්ගේ ශරීරයේ වැදී හතරේ සීමාව වෙත ගොස් එංගලන්ත පිලට එක්වූ අතිරේක ලකුණු 04ත් සමඟ එම පන්දුවේදී එංගලන්ත පිලට ලකුණු 06ක් හිමිවුණා.එම අවස්ථාවට මුහුණ දුන් බෙන් ස්ටොක්ස් සිදුවූ එම සිදුවීම සම්බන්ධයෙන් “මම කේන්ට කිව්වා මගේ ජීවිත කාලය පුරාම මම ඒ ගැන සමාව ඉල්ලනවා” යනුවෙන් පවසා තිබෙනවා.

තරඟ 62යි පරාජ 37යි. මෙන්න විසඳුම

එංගලන්තයේදී හෙටින් (14) අවසන් වන ලෝක කුසලාන ක්‍රිකට් තරගාවලියේදී තරග 7කට (වර්ෂාවෙන් බාධා එල්ල වූ තරග දෙක නොමැතිව) සහභාගි වූ ශ්‍රී ලංකා කණ්ඩායම තරග තුනක් ජයගෙන තරග හතරක් පරාජය වී ඉදිරි වටය අහිමි වීම හේතුවෙන් වේලාසනින්ම මවුබිමට පැමිණියද හෙට (14දා) පැවැත්වෙන අවසන් තරගය සඳහා නවසීලන්තය හා එංගලන්තය මේ වනවිටත් සූදානම්ව සිටින්නේ සැබවින්ම ඔවුන් දක්‍ෂතාවලින් පරිපූර්ණව සිටින කණ්ඩායම් නිසා බව රහසක් නෙමෙයි.ජාත්‍යන්තර එක්දින වර්ගීකරණයේ බටහිර ඉන්දීය කොදෙව්වන්ටත් පහළින් එනම් 9 වැනි ස්ථානයේ රැඳී සිටිමින් ලෝක කුසලාන ක්‍රිකට් තරගාවලියට පිවිසි ශ්‍රී ලංකා පිල අවසානයේදී කොදෙව්වන් පමණක් පසුපසට දමමින් එක් ස්ථානයක් ඉදිරියට පැමිණ තරගාවලිය නිම කළා.එත් ශ්‍රී ලංකා කණ්ඩායමට මෙයට වඩා දෙයක් කළ හැකිව තිබූ බව ශ්‍රී ලංකා කණ්ඩායමේ පුහුණුකරු, කළමනාකරු හා නායකයාම පිළිගැනීම තුළින් පෙනී යන්නේ ශ්‍රී ලංකා කණ්ඩායම තරගාවලියට පිවිස ඇත්තේ යහපත් මානසිකත්වයකින් නොවන බවය. විනය, කණ්ඩායම් හැඟීම, ඉවසීම, දරා ගැනීමේ ශක්තිය යන ප්‍රධාන අංගයන් සඳහා වැඩි දායකත්වයක් සැපයෙන්නේ පාසල් ක්‍රිකට් ක්‍රීඩාව තුලින්. එහෙනම් ශ්‍රී ලංකා ජාතික ක්‍රිකට් කණ්ඩායමට ක්‍රීඩකයන් බිහි කරන ‘කලලය’ නිර්මාණය වන්නේ පාසල් ක්‍රිකට් ක්‍රීඩාවෙන් වුවත් වර්තමානයේදී පාසල් ක්‍රිකට් ක්‍රීඩාව තුළින් ක්‍රීඩකයන් බිහි වන්නේ ‘හාවා හඳ දකින’ මට්ටමේ බව හිටපු තේරීම් කමිටු සභාපතිවරයකුද ප්‍රකාශ කිරීම තුළ ශ්‍රී ලංකා පාසල් ක්‍රිකට් ක්‍රීඩාවට අත්ව ඇති ඉරණම පැහැදිලිය. ඔහුගේ කියමන 100%ක්ම නිවැරදි බව කියන්න අවශ්‍යයි.1980-2000 දශකවලදී පාසල් ක්‍රිකට් ක්‍රීඩාවේ යෙදුණ ක්‍රීඩකයන් අතරින් ශ්‍රී ලංකා කණ්ඩායම නියෝජනය කරන ක්‍රීඩකයන් කවුද යන්න මුළු රටේම ක්‍රීඩාලෝලීන්ට ඇස් වසාගෙන කීමට පුළුවන්කම තිබිණි. එම වකවානුවලදී ශ්‍රී ලංකාවේ පාසල් ක්‍රිකට් ක්‍රීඩාව මුදුන් පෙත්තටම යෑමට හැකිව තිබුණේ එම අවධියේදී ක්‍රිකට් කරවූ මහත්වරුන් ඔවුන්ට හිමිවූ සොච්චම් වැටුපට එහා ගොස් තම ශ්‍රමය හා කාලය කැප කළ නිසා බව සැවොම දන්නා කරුණකි. මේ හේතුවෙන්ම එම වකවානුවේදී පාසල් ක්‍රිකට් ගමන නිමාකළ සැණින්ම ජාතික කණ්ඩායමේ ‍ෙදාර විවර කර ගැනීමට සමත්වූ ක්‍රීඩකයන් අතර අර්ජුන රණතුංග (අවුරුදු 18දී), අරවින්ද ද සිල්වා (19), හෂාන් තිලකරත්න (19), අසංක ගුරුසිංහ (19), රොෂාන් මහානාම (20), සනත් ජයසූරිය (20), චමින්ද වාස් (20), මාවන් අතපත්තු (20), මහේල ජයවර්ධන (20), තිසර පෙරේරා (20) ප්‍රධාන තැනක් ගත්තා.

කෙසේ වෙතත් ශ්‍රී ලංකා ජාතික කණ්ඩායමට ක්‍රීඩකයන් දායාද කරන ‘විශ්වවිද්‍යාලය’ බිමට සමතලා වීමට අවශ්‍ය මාර්ගය සකසා තිබෙන්නේ කාලයක් පුරා එම ‘විශ්වවිද්‍යාලය’ රජ බොජුනක් කරගත් අදූරදර්ශී නිලධාරී මණ්ඩලයෙහි ක්‍රියාකලාපය හේතුවෙන් බව අමුතුවෙන් මතක් කර දිය යුතු නැහැ.වර්තමානයේදී ශ්‍රී ලංකා කණ්ඩායම නියෝජනය කරන ක්‍රීඩකයන් අතරින් පාසල් ක්‍රිකට් නතර කළ සැණින්ම ජාතික කණ්ඩායම නියෝජනය කිරීමට වාසනාව උදාකරගෙන ඇත්තේ අවිශ්ක ප්‍රනාන්දු පමණක් වීමද ශ්‍රී ලංකාවේ පාසල් ක්‍රිකට් ක්‍රීඩාව එසේ වළපල්ලට ගොස් ඇති බවට කදිම සාක්ෂියක්.1998දී උපන් අවිශ්ක ප්‍රනාන්දුට වයස අවුරුදු 18දී එනම් 2016 වසරේදී එක්දින වරම් දිනාගැනීමට හැකි වුවද එම වසරෙන් පසු පාසල් කණ්ඩායම නියෝජනය කර අවසන් වූ සැණින්ම ශ්‍රී ලංකා එක්දින කණ්ඩායම නියෝජනය කිරීමට ආසන්නතම අවස්ථාව උදාකරගෙන තිබෙන්නේ කමිඳු මෙන්ඩිස් පමණි. මේ වනවිට ඔහුටද කණ්ඩායමේ ස්ථානය සුරක්ෂිත කරගැනීමට නොහැකි වී ඇත්තේ බලධාරීන් ඔහු පිළිබඳව නිසි අයුරින් විමසා නොබැලූ නිසා බව පෙනෙන්නට තිබෙනවා.

12 වැනි ලෝක කුසලාන ක්‍රිකට් තරගාවලිය අදින් නිමාවට පත් වුවද ලැබූ අමිහිරි අත්දැකීම් ඊළඟ ලෝක කුසලාන ක්‍රිකට් තරගාවලියේදී සිදු නොවීමට ක්‍රිකට් කරවන මහත්වරු දැන් සිටම වගබලා නොගතහොත් තවත් සිවු වසරකින් (2023දී) ඉන්දියාවේදී ආරම්භ වන එම තරගාවලියත් සහභාගිවීමට පමණක් සීමා වූ තරගාවලියක් බවට පත්වීම වලක්වන්නට බැහැ. ඒ සඳහා සූදානම් වීමට ක්‍රිකට් පරිපාලනයේ නිරත වන මහත්වරුන් “කණ්ඩායම සුද්ද කිරීම” දැන් සිටම සිදුකළ යුතු අතරම, ක්‍රීඩක පළපුරුද්ද පමණක්ම ප්‍රධාන කරගනිමින් ඊළඟ ලෝක කුසලානයට යෑම විහිළුවට කරුණක් බවට පත්විය හැකි වන්නේ මෙවරද ‘පළපුරුද්ද’ ඉදිරියට දමා රැගෙන ගිය ඇතැම් ක්‍රීඩකයන්ට අත්වූ ඉරණම දැකීමෙනි.වර්තමානයේදී ලෝක කුසලාන ක්‍රිකට් තරගාවලියටද විස්සයි-20 ක්‍රිකට් රටාව (වේගයෙන් ලකුණු රැස්කිරීම) මුසු වී ඇති මොහොතක තරුණ ජවය පසෙකට විසිකර ‘පළපුරුද්ද’ පමණකින්ම යැපීමට සුදානම් වීම මෝඩකමකි. අඩුම වශයෙන් තවත් වසර දෙකක් හෝ තුනක් හෝ කණ්ඩායමේ නියැළීමට අවස්ථාව තිබියදීත් මහේල ජයවර්ධන, කුමාර් සංගක්කාර හා ටී.එම්. ඩිල්ෂාන් 2015 ලෝක කුසලාන ක්‍රිකට් තරගාවලියෙන් පසු කණ්ඩායමට සමු දුන්නේත් ඉදිරි ලෝක කුසලාන ක්‍රිකට් තරගාවලිය සඳහා නවකයන්ට සූදානම්වීමට අවශ්‍ය කාලයක් ලබා දෙමින් බව ඉතිහාසය සාක්‍ෂි දරා තිබෙනවා.

ඒ අනුව මහේල, සංගා හා ඩිල්ෂාන් අනුගමනය කළ ක්‍රමය අනුගමනය කරමින් ඊළඟ ලෝක කුසලාන ක්‍රිකට් තරගාවලියටත් මෙම නඩයෙන්ම යැපීමට සූදානම් නොවී අවිශ්ක වැනි තරුණ ක්‍රීඩකයන් කිහිප දෙනකු බිහිකර ගැනීම ක්‍රිකට් කරවන මහත්වරුන්ගේ යුතුකමක් හා වගකීමක්.කරුණු කාරණා කෙසේ වුවත් 2017 වසරේ දෙසැම්බර් මස සිට වසරකට රුපියල් කෝටි 6කට ආසන්න (දිමනා නොමැතිව) වැටුපක් ලබන බවට පැවසෙන එමෙන්ම ලොව වැඩිම වැටුපක් ලබන ක්‍රිකට් පුහුණුකරුවන් අතරින් සිවුවැනියා බවට පත්ව සිටින චන්දික හතුරුසිංහගෙන් අපේක්ෂිත සේවාව ඉටුවුණාද කියා කිසිවකුට හෝ ප්‍රශ්නයක් මතු නොවේ නම් එය පුදුමයක්.එයට ආසන්නතම හේතු ගණනාවක් ඇත. හතුරුසිංහ මහතාගේ පුහුණුකාරීත්වය යටතේ 2018 වසරේ ජනවාරි මාසයේ සිට ශ්‍රී ලංකා කණ්ඩායම එක්දින තරග 36කට සහභාගි වී ජයග්‍රහණ 10ක් ලබා ඇති නමුත් පරාජයන් 22ක්ද, ටෙස්ට් තරග 16කදී 6ක් ජයගෙන පරාජයන් 7ක්ද, විස්සයි-20 තරග 10කට සහභාගි වී තරග 8ක්ම පරාජය වී තිබීමේ වගකීමෙන් නිදහස් වීමට ඔහුට හැකියාවක් නැහැ. වසරකට රුපියල් කෝටි 21කට ආසන්න වැටුපක් ලබමින් ලොව වැඩිම වැටුපක් ලබන ක්‍රිකට් පුහුණුකරුවන් අතර පළමු ස්ථානයේ පසුවන ඉන්දියාවේ රවී ශාස්ත්‍රි පුහුණුකරණයේ යෙදෙන ඉන්දීය කණ්ඩායමත්, දෙවැනියට වැඩිම වැටුපක් ලබන (වසරකට රුපියල් කෝටි 12කට ආසන්න) ජස්ටින් ලැන්ගර්ගේ ඕස්ට්‍රේලියානු කණ්ඩායමත්, තෙවැනියට වැඩිම වැටුපක් ලබන (වසරකට රුපියල් කෝටි 9කට ආසන්න) ට්‍රෙවර් බේලිස්ගේ එංගලන්ත කණ්ඩායමත් ලෝක කුසලාන ක්‍රිකට් තරගාවලියේ අවසන් පූර්ව වටයට සුදුසුකම් ලැබූ නමුත් සිවුවැනියට වැඩිම වැටුපක් ලබන චන්දික හතුරුසිංහගේ පුහුණුකාරීත්වය යටතේ ශ්‍රී ලංකා කණ්ඩායම හයවැනි ස්ථානයට පත්වූයේ ඇයිද යන්නත් විමසා බැලිය යුතුය. ඒ අනුව ඉදිරියෙන්ම සිටින පුහුණුකරුවන් තිදෙනා ඔවුන් ලබාගන්නා වැටුප වෙනුවෙන් ඔවුන්ගේ උපරිම දායකත්වය කණ්ඩායම වෙනුවෙන් ලබා දී තිබියදී හතුරුසිංහගෙන් ශ්‍රී ලංකා කණ්ඩායමට ලැබී ඇති දායකත්වය තේරුම්ගෙන ඔහුට ලබාදිය යුතු ස්ථානය ඉදිරියේදී තීරණය කිරීම බලධාරීන්ගේ යුතුකමකි. “මට තව මාස 16ක පමණ කොන්ත්‍රාත් කාලයක් තියෙනවා. ඒ කාලයත් මම ඉන්නවා” යනුවෙන් පසුගියදා පැවැති මාධ්‍ය හමුවකදී හතුරුසිංහ කළ ප්‍රකාශයෙන් පැහැදිලි වන්නේ ලැබී ඇති ‘නිධානය’ අත්හැර යෑමට කිසිදු කැමැත්තක් ඔහු තුළ නොමැති බවයි.

මේ අතර ‘ක්‍රීඩකයන් සෙල්ලම් කළ යුත්තේ පුහුණුකරුවන් වෙනුවෙන් නොවෙයි, රට වෙනුවෙන්’ යැයි මෙවර ලෝක කුසලානයේදී ශ්‍රී ලංකාව පැත්තෙන් සාර්ථකම වූ එකම පන්දු යවන්නා බවට පත්වූ ලසිත් මාලිංග සඳහන් කළ ප්‍රකාශයට මල් මිටක් පිදිය යුතුය. පුහුණුකරුවන් වෙනුවෙන් ක්‍රීඩා කිරීමට අවශ්‍ය නම් මිලියන ගණන් මුදල් වියදම් කරමින් පුහුණුකරුවන් ගෙන්වීමේ අවශ්‍යතාවක් නැත. එසේ නම් ක්‍රිකට් බලධාරීන් පළමුව කළ යුත්තේ ‘රට වෙනුවෙන්’ පමණක් සෙල්ලම් කරන ක්‍රීඩකයන් පිරිසක් සොයා ගැනීමයි.අවසන් වශයෙන් එක් කරුණක් සඳහන් කළ යුතුව ඇත. ශ්‍රී ලංකාවේ ජනප්‍රියතම ක්‍රීඩාව ලෙස පිළිගැනෙන ක්‍රිකට් ක්‍රීඩාව තමන්ගේ හදවත තුළ තැන්පත් කරගනිමින් ජීවත් වන ක්‍රීඩාලෝලීන්ගේ ඇස් වසා කවුරුන් කෙසේ පිනුම් ගැසුවත් ක්‍රීඩකයන්, පුහුණුකරුවන් හා නිලධාරීන් මේ ‘කාබාසිනියා’ කරන්නේ මහජන මුදල් බව දැනගත යුතු අතරම කෙදිනක හෝ එයට දඬුවම් විඳීමට සිදුවන බවත් මතක තබා ගත යුතුමය.- විචිත්‍ර වීරසිංහ

තරග දිනවන්නන්

නරක දිනයක දී ක්‍රිකට් ක්‍රීඩකයෙකුට සියල්ල නරකට හිටිය හැකිය. උඩපන්දු අත්හැරිය හැකිය. පිත්ත පන්දුවට යොමු නොවිය හැකිය. පන්දුව යවන්නට පෙර එය හරිහැටි ග්‍රහණය කරගන්නටවත් නොහැකි විය හැකිය. ඒ අවාසනාව ය.හොඳ දිනයක දී ක්‍රිකට් ක්‍රීඩකයෙකු කරන වැරදි වුවද ඔහුට සාර්ථකත්වය ගෙන ආ හැකිය. අහක යන උඩ පන්දු පවා අතේ සිරවිය හැකිය. පිත්තේ කොනේ වදින පන්දු හතරේ සීමාවට ඇදී යා හැකිය. ෆුල්ටොස් පන්දුවලට ද කඩුලු ලැබිය හැකිය. ඒ වාසනාව ය.එහෙත් ක්‍රිකට් ක්‍රීඩාවේ ජයග්‍රහණය සෑමවිටම රඳා පවතින්නේ වාසනාව මත නොවේ. ඊට “තරග වෙනස් කළ හැකි ක්‍රීඩකයන්” අත්‍යාවශ්‍ය ය.තරගයක යම් නිශ්චිත මොහොතක දී ඊට බියගුළුව ක්‍රීඩා කරනවා වෙනුවට කිසිවෙකු නොසිතන නොපතන අයුරින් ක්‍රීඩා කොට ප්‍රතිවාදීන්ගෙන් තරගය උදුරාගන්නන් “තරග වෙනස් කරන්නන්” ලෙස හැඳින්විය හැකිය. ඔවුන් බොහෝ විට ‘තරගයේ වීරයා‘ සම්මානයෙන් පිදුම් ලබන්නේ නැත. ‘ක්‍රිකට් පුරාවෘත්ත‘ අතරට එක්වන්නේ ද නැත. තරගයේ ලකුණු සටහන දෙස බැලීමේ දී ඔවුන්ගේ නම් කැපී පෙනෙන්නේ ද නැත. ඔවුන්ගේ ලකුණු සාමාන්‍යයන් සිත්ගන්නා සුළු වන්නේ ද නැත. එහෙත් තරගයේ ගලා යෑම වෙනස් කරමින් තරගය තමන්ගේ පිල වෙතට හරවන්නේ ඔවුන් බව “ක්‍රිකට් බුද්ධිය” ඇත්තන් හොඳින් හඳුනයි.තරග වෙනස් කරන්නන් යනු යම් ස්ථිර රාජකාරියක් සඳහා කණ්ඩායමේ සිටින්නන්ය. ඔවුන්ගේ රාජකාරිය දිනපතා පිත්තෙන් ලකුණු 100ක් වාර්තා කිරීම නොවේ. දිනපතා කඩුලු 5කින් දස්කම් දැක්වීම ද නොවේ. දිනපතා උඩපන්දු 2ක් 3ක් රැකගැනීම ද නොවේ. ඔවුන් තරගයට ලබා දෙන හැරවීම ගණිතයෙන් කියවිය නොහැක්කකි. ඇතැම් විට ඔවුන් ලබාගන්නා අවදානම නිසා තරගය පරාජය වෙන්නට ද සිදු විය හැකිය. ප්‍රේක්ෂකයන්ගෙන් නොඅඩුව බැනුම් අසන්නට ද සිදු විය හැකිය. ඒ ඔහුගේ රාජකාරියේ කොටසකි.ක්‍රිකට් යනු කණ්ඩායම් ක්‍රීඩාවකි. පිතිකරුවන් හයදෙනාටම හෝ හත්දෙනාටම ශතක වාර්තා කළ නොහැකිය. පන්දු යවන්නන් පස්දෙනාටම හෝ හයදෙනාටම කඩුලු 5 බැගින් දවාලිය නොහැකිය. පන්දු රකින්නන් සියලු දෙනාටම උඩපන්දු දෙකක් හෝ තුනක් රැකගත නොහැකිය. කණ්ඩායම තුළ තමන්ගේ කොටස කුමක්ද, බර කුමක්ද, තමන්ගේ රාජකාරිය කුමක්ද යන්න වටහා ගැනීම අත්‍යාවශ්‍ය ය. “තරග වෙනස් කරන්නන්” විශේෂ වන්නේ මමත්වය පසෙකලා අනෙකා වෙනුවෙන් තරගයේ පීඩනය තමන් වෙතට ගෙන එය ප්‍රතිවාදියා වෙතට හරවා යවන්නන් ඔවුන් වන බැවිනි. තමන්ගේ කොටස අකුරටම ඉටුකරන්නන් ඔවුන් වන බැවිනි. ටෙස්ට් තරගවලට වඩා සීමිත පන්දුවාර තරගවලට “තරග වෙනස් කරන්නන්” අතිශයින්ම වැදගත් ය. ශ්‍රී ලංකාව එක්දින තරග ලොවේ ප්‍රබල කණ්ඩායමක් වූ හේතුව ඔබට පැහැදිලි ද? මෑත කාලීනව සැබෑ ක්‍රිකට් ප්‍රේක්ෂකයන් ක්‍රිකට් ක්‍රීඩාවෙන් ඉවත් වී, “ගූගල් සොයන්නන්” වැඩි වශයෙන් ක්‍රිකට් ක්‍රීඩාව වෙත යොමු වී ඇති බව සමාජ ජාලා වෙත අවධානය යොමු කිරීමේ දී දැකගත හැක්කකි. ඔවුන්ට ක්‍රිකට් බුද්ධියක් නැතත් ඔවුන්ට ගණිත බුද්ධිය ඇත. ඔවුන් ක්‍රිකට් ක්‍රීඩාව මනින්නේ ගණිතයෙනි.

එබැවින් අනාගත ශ්‍රී ලංකා සමාජ ජාලා ක්‍රිකට් ප්‍රේක්ෂකයින් සනත් ජයසූරිය හටත් ඔහුගේ එක්දින ලකුණු සාමාන්‍යය (32.36) පදනම් කරගෙන උසුළු විසුළු කරන්නට පටන් ගතහොත් මම පුදුම නොවෙමි. එහෙත් ක්‍රිකට් බුද්ධිය ඇති අයට විහිළුවක් වන්නේ එසේ කරන්නන්ම ය. සනත් ජයසූරිය ක්‍රීඩා කරනු දුටු කෙනෙකුට, ඔහු ලකුණු 32ක සාමාන්‍යයකින් තරග දිනවූ හැටි දන්නා කෙනෙකුට, පවතින වර්තමානයම විහිළුවකි.ක්‍රිකට් යනු මේසය මත පෑනෙන් කරන ගණන් හැදීමක් හෝ පරිගණක යතුරු පුවරුව මත කරන හරඹයක් නොවේ. ක්‍රිකට් ක්‍රීඩාවට ගණිත දත්තයන් වැදගත් නැතැයිම කියා කිව නොහැකිය. එහෙත් ක්‍රිකට් ක්‍රීඩාවේ දී වඩා වැදගත් වන්නේ ගණිත බුද්ධිය නොව, “ක්‍රිකට් බුද්ධිය (Cricket sense)”යි. තරග වෙනස් කළ හැක්කන් හඳුනා ගැනීම ක්‍රිකට් බුද්ධියේ කොටසකි. ක්‍රිකට් පරිපාලකයන්, පුහුණුකරුවන් සහ ප්‍රේක්ෂකයන් එසේ තරග වෙනස් කළ හැක්කන් හඳුනා නොගතහොත් වළට වැටෙන්නේ එරට ක්‍රිකට් ය. වචනයෙන් ඔවුන්ව පැහැදිලි කරනවාට වඩා පහසුවෙන් එවැනි ක්‍රීඩකයන් කිහිප දෙනෙකු හරහා එය පැහැදිලි කළ හැකිය. උදාහරණ සඳහා වැඩිදුර යා යුතු නැත. ශ්‍රී ලංකාවේ සිටි තරග වෙනසක් කරවන්නන් සිහිකරමු.

සනත් ජයසූරිය – “සනත් 50ක් ගැහුවොත් මැච් එක දිනුම්” කියමන සැබෑ ක්‍රිකට් ප්‍රේමීන්ගේ පරම්පරාවේ සිටියවුන්ට සුපුරුදු වදනකි. එය අතිශයෝක්තියක් නොවේ. සනත්ට තණතීරුවේ ස්වභාවය වැදගත් නැත, පන්දු යවන්නන්ගේ නම් අදාළම නැත, ලකුණු පුවරුවේ පීඩනය ද අදාළම නැත. සනත් 50ක් ගැහුවොත් දිනනවාම ය. අතරින් පතර තරගයක් දෙකක් පැරදුනත් ප්‍රේක්ෂකයා දිනනවාම ය.සනත්ට පන්දු යවන්නට ලැබුණු විට ද එසේමය. දිගු සබඳතා බිඳ හෙළන්නට ඔහු උපන් හපනෙකි. ලකුණු නැවැත්විය යුතුම මොහොතක දී ලකුණු නොදී පන්දු යවන්නට ද ඔහුට හැකිය. ඔහුගේ පන්දු රැකීම ද කිසිවකට දෙවෙනි නැත. බාග අවස්ථා, එනම් පන්දුව කෙළින්ම කඩුල්ලට එල්ල කොට දුවද්දී දවා ගැනීම්, අපහසු උඩපන්දු රැකගැනීම් වලින් ඔහු තරග දිනවූ වාර ගණන බොහොමයකි. සනත් ඔහුගේ දවසේ දී තරග දිනවන්නෙක් (Match winner on his day) පමණක්ම නොවේ. බොහෝ විට දස්කම් අතර සිටි සනත් ඕනෑම දිනයක තරගයක් දිනවිය හැක්කෙකි (Match winner on any day). ඒ වාසනාව නිසා නොව, ඔහුගේ රාජකාරිය ඔහු හඳුනාගත් නිසාය. සනත් යනු Impact player කෙනෙකි.

රොමේෂ් කලුවිතාරණ – ඔහු කඩුලු රකින පිතිකරුවෙකි. මැදපෙළ සිට ආරම්භක පිතිකරණය දක්වා උසස් වූයෙකි. ඔහුගේ එක්දින ලකුණු සාමාන්‍යය 22.22කි. වත්මන් සමාජ ජාලා ප්‍රේක්ෂකයන්ට අනුව බැලුවහොත් ඔහු දුර්වල පිතිකරුවෙකි. පිතිකරණයෙන් ඔහු තරග දිනවූ අවස්ථාවන් ගණන මද බව පිළිගත හැකිය. එහෙත් ඔහු සනත් ජයසූරිය සමඟ වේගයෙන් කඩුලු අතර දිවගොස් පීඩනය ප්‍රතිවාදීන් වෙත හරවා යැවූයෙකි. පිත්තෙන් ඉක්මන් ලකුණු 25ක් 30ක් ලබාගෙන, කඩුලු රැකීමෙන් නොතිබූ අවස්ථා ජනනය කළ හැකි ක්‍රීඩකයෙකි. ‘ජිමික් කාරයෙකි‘. පිතිකරුවන් සමඟ කතා කොට ඔවුන්ගේ දුර්වලකම් පන්දු යවන්නාට සන්නිවේදනය කිරීමේ දක්ෂයෙකි.1996 ලෝක කුසලාන අවසන් පූර්ව තරගයේ සචින් ටෙන්ඩුල්කාර්ගේ කඩුල්ල සහ එක්තරා ශ්‍රී ලංකා – ඕස්ට්‍රේලියා තරගයක ඩැරන් ලීමන්ගේ කඩුල්ල, ශ්‍රී ලංකා – කෙන්යා තරගයක දී සිදු කළ තවත් කපටි දවා ගැනීමක් ඇතුළු තරග කිහිපයක දී ඔහු විසින් ජනනය කළ තීරණාත්මක අවස්ථාවන් රැසක් අපගේ මතකයේ ඇත. එලෙස නැති අවස්ථා ජනනය කොට අවශ්‍යම කඩුලු බිඳ හෙලූ කලූ ද Impact player කෙනෙකි.

රසල් ආනල්ඩ් – ශ්‍රී ලංකා පිතිකරණ ලැයිස්තුවේ අංක 6 ස්ථානය කලකට පෙර අයත්ව තිබුණේ ‘අංක 69′ සහිත ජර්සිය පැළඳී මේ කෙට්ටු පිතිකරුවාට ය. පළමුවෙන් පන්දුවට පහර දෙන ඉනිම්වල ලකුණු තත්වය අවසන් පන්දු වාර කිහිපයේ දී වැඩි කරගැනීමේ විශේෂ හැකියාවක් සහිත වූ රසල්, හයේ පහරවල් එල්ල කළ ක්‍රීඩකයෙකු නොවේ. මැදපෙළ පිතිකරුවෙකු වශයෙන් අනිවාර්යයෙන්ම තිබිය යුතු හැකියාවක් වන ‘දඟපන්දු යවන්නන්ට නිලකුණු පන්දු අඩුවෙන් ලබා දී ක්‍රීඩා කිරීම‘ ඔහුට හොඳින්ම කළ හැකිව තිබුණි. ස්වීප් පහර ඔහුගේ ප්‍රධාන අවියකි.තරගයක දී ලකුණු 100ක් වාර්තා කිරීම ඔහුගේ රාජකාරිය නොවේ. තරගයේ ස්වභාවය අනුව මැදපෙළ සමඟ පන්දුවාර 15ක් 20ක් පුරාවට ඉක්මනින් ලකුණු රැස්කිරීම ඔහුගේ රාජකාරියයි. එය හොඳින් ඉටු කළ ආනල්ඩ්, පන්දු රැකීමෙන් ද ඉහළින්ම සිටි අයෙකි. එක ලකුණ, ලකුණු දෙක නවත්වා, අවශ්‍ය නම් පන්දු යැවීමෙන් ද පන්දුවාර 5ක් හෝ ඇතැම් විට 10ම හෝ යැවීමේ හැකියාව තිබූ ඔහු ඒ සියලු ආකාරයෙන්ම තරග ජයග්‍රහණය කර දී ඇත. ආනල්ඩ් ද Impact player කෙනෙකි.

ටී. එම්. ඩිල්ෂාන් – ඩිල්ෂාන් ආරම්භක පිතිකරුවෙකු වන්නට පෙර මැදපෙළ පිතිකරුවෙකි. එකල ඔහුගේ රාජකාරිය වූයේ නිදහසේ පන්දුවට පහර දීමයි. නමුත් ඔහු එය කළේ සිහි විකල් වූයෙකු ලෙස නොව හොඳින් සිහි ඇතිවෙකු ලෙස ය. ලකුණු 50ට කඩුලු 4ක් දැවී තිබියදීත්, ලකුණු 200කට කඩුලු 4ක් දැවී තිබියදීත් ඩිල්ෂාන් ක්‍රීඩා කළේ එකම ප්‍රවේගයකිනි.2007 ලෝක කුසලාන අවසන් පූර්ව තරගයේ දී පළමුවෙන් පන්දුවට පහර දුන් ශ්‍රී ලංකාව, නවසීලන්තයට එරෙහිව පන්දුවාර 34ක දී ලකුණු 152කට කඩුලු 4ක් දැවී සිටියේය. පිටියේ සිටි මහේල ජයවර්ධන දැඩි පීඩනයකට හසුව සිටි අතර එතැන දී පිටියට පිවිසෙන ඩිල්ෂාන් පන්දු 27කින් ලකුණු 30ක් ලබාගෙන පීඩනය ඉවත් කළ අතර, ඉන් පන්නරය ගත් මහේල ශතකයක් වාර්තා කරමින් ලකුණු 289ක් දක්වා ශ්‍රී ලංකා ඉනිම ගෙන ගියේය.සබඳතා බිඳ හෙළන්නෙකු ලෙස පන්දු යැවීමෙන් දස්කම් දැක්වූ ඩිල්ෂාන්, අත්‍යාවශ්‍යම කඩුලු දවා ගනිමින් ශ්‍රී ලංකාවට ජයග්‍රහණයේ මාවත විවර කළ අවස්ථා බොහොමයකි. පසුව ආරම්භක පිතිකරුවෙකු වූ ඔහු එහි දී ද තරග දිනවන්නෙකු විය. බාග අවස්ථා සාර්ථක කරගනිමින් දුවද්දී දවා ගැනීම් ලබා ගත් අති දක්ෂ පන්දු රකින්නෙකු ද වූ ඔහු සෑම ඉරියව්වකින්ම තරග දිනවූ Impact player කෙනෙකි.

උපුල් චන්දන – ශ්‍රී ලංකාවේ සිටි අතිදක්ෂ පන්දු රකින්නෙකි. පා දඟපන්දු යවන්නෙකු ලෙස ක්‍රීඩා කළ ද කණ්ඩායමට අවශ්‍යම වෙලාවල් වලදී ඔහු පන්දුවට පහර දීමෙන් ද ඉක්මන් ලකුණු වාර්තා කොට දී ඇත. ඇතැම් අවස්ථාවල ජයග්‍රහණයේ හෝ පරාජයේ වෙනස වන්නේ ඔහු විසින් ලබාගන්නා ඒ ඉක්මන් ලකුණු 25-30 විය. ප්‍රතිවාදී පිතිකරුවන් ස්ථාවර සබඳතාවයක නිරත වන්නේ නම්, ඔහුව දවා ගැනීමට කිසිසේත්ම හැකියාවක් ද නැතිනම් ඔහු වැනි පන්දු රකින්නන්ගේ වටිනාකම සබයට පැමිණේ. එවන් අවස්ථාවල කෙළින්ම පන්දුව කඩුල්ලට එල්ල කොට දුවද්දී දවා ගැනීම් ලබා ගත හැකි ඔහු ද Impact player කෙනෙකි.ලසිත් මාලිංග – ශ්‍රී ලංකාවෙන් බිහි වූ අතිදක්ෂ පන්දු යවන්නන් අතර මුත්තයියා මුරලිදරන් සහ චමින්ද වාස් පෙරමුණේ සිටියි. ඔවුන් ඔවුන්ගේ රාජකාරිය සෑම දිනයක දී ම ඉතා හොඳින් හෝ සාමාන්‍ය අයුරින් හෝ ඉටු කළේය. චමින්ද වාස් පළමු පන්දුවාර කිහිපයේ දී සහ අවසන් පන්දුවාර කිහිපයේ දී කඩුලු දවාගත්තේය. මුරලි කඩුලු දෙකක් හෝ තුනක්, නැතිනම් හොඳම දිනයක දී ඊට වැඩි කඩුලු ගණනක් දවාගත්තේය. එකල ශ්‍රී ලංකාව දෙවනුව පන්දු යවමින් තරගයක් ජයගත්තේ නම් තරගය අවසන් පන්දු වාරය හෝ දෙක වෙත ඇදී යන අවස්ථා අඩු ය. ඉහත කී දෙදෙනා තරගයේ මැද දී ම ප්‍රතිවාදීන්ගේ හිස සිඳලීම ඊට හේතුවයි.එහෙත් අවසානය තෙක් ඇදී යන තරගයක් උච්චතම ස්ථානයට පැමිණි විට තරගය ජයග්‍රහණය කිරීම සඳහා අවශ්‍ය පන්නයේ පන්දු යවන්නෙක් ලෙස ලසිත් මාලිංගව හැඳින්විය හැකිය. ඉතාම දැඩි පීඩනයක් මැද නිසි ඉලක්කයට නිලකුණු පන්දු යවමින්, නොඑසේ නම් පා ඇඟිලි තැලෙනසුළු යෝකර් පන්දු යවමින් තරගය වෙනස් කිරීමේ හැකියාව මාලිංගට තිබුණි. ඔහුට කෙතරම් පහර වැදී තිබුණ ද, තරගයේ අවසානයේ දී සියල්ල වෙනස් කිරීමේ හැකියාව ඔහුට තිබුණි. එබැවින් ඔහු ද Match winner කෙනෙකි.

අරවින්ද ද සිල්වා – පිත්තෙන්, පන්දුවෙන් හෝ පන්දු රැකීමෙන් යන ඕනෑම ක්‍රමයකින් තරග ජය ගැනීම දක්වා මෙහෙයවීමේ විශේෂ හැකියාවක් අරවින්ද සතු විය. ඔහු ද ඔහුගේ දිනයේ දී තරග දිනවන්නෙකු නොව, නිරන්තරයෙන් තරග දිනවන්නෙකි. අරවින්ද පිටියට පැමිණෙන විට කණ්ඩායම වැටී සිටින තැන හෝ නැග සිටින තැන ගැන කිසිසේත්ම සැලකිල්ලට නොගනියි. ඔහු ක්‍රීඩා කරන්නේ “ශ්‍රී ලංකාවේ ක්‍රිකට් සන්නාමය” (Sri Lankan brand of cricket) අනුව ය. එනම් දිගින් දිගටම ප්‍රතිවාදියා හා පොර බදන ක්‍රමයයි, සටන්කාමීත්වයයි.තමන්ගේ දස්කම් විශ්වාස කළ අරවින්ද, ඊට සාධාරණය ඉෂ්ට කළේය. මුරලිදරන්, වාස් ඇතුළු සියල්ලන්ටම කඩුලු ලබා ගත නොහැකි නම්, අරවින්ද පන්දුව අතට ගනියි. නැතහොත් දුවද්දී දවා ගැනීමක් දෙකක් සාර්ථක කරගනියි. ඒ අරවින්ද Impact P‍layer කෙනෙක් වූ නිසාය. 1996 ලෝක කුසලාන අවසන් පූර්ව තරගයේ දී පිත්තෙනුත්, අවසන් මහා තරගයේ දී තුන් ඉරියව්වෙනුත්, 2003 ලෝක කුසලාන අවසන් පූර්ව තරගයේ දී පන්දුවෙනුත්, 2002 ශූරයන්ගේ කුසලාන තරගාවලියේ දී පන්දුවෙන් සහ පිත්තෙනුත් තරග වෙනස් කළේ අන් කිසිවෙකු නොව අරවින්ද ය. ඔහු අනිවාර්යයෙන්ම ‘මහා තරග සඳහා උපන් ක්‍රීඩකයෙකි‘ (Big match player). ශ්‍රී ලංකාවෙන් බිහි වූ හොඳම තරග දිනවන්නන් දෙදෙනා සනත් ජයසූරිය සහ අරවින්ද ද සිල්වා යැයි මෙහි සටහන් කළ හැකිය.ලොවින් උදාහරණ… – බාග අවස්ථාවන් සම්පූර්ණ බවට පෙරලාගැනීම. – ඉන්දියානු එක්දින කණ්ඩායමේ සිටි සුරේෂ් රෙයිනා, යුවරාජ් සිං, රවීන්ද්‍ර ජඩේජා එවැනි තරග වෙනස් කරන ක්‍රීඩකයන් ය. මැදපෙළින් පැමිණ පන්දු 25කට පමණ ලකුණු 35ක් 40ක් ලබාගෙන ප්‍රතිවාදීන්ට තරගයේ පීඩනය පැනවූ ඔවුන්, පන්දුවාර 5ක් 6ක් ලකුණු 25කට 30කට පමණ යවා පන්දුවාර වේගය ද ඉක්මන් කරයි. පන්දු රැකීමේ දී මේ දෙදෙනාම විශිෂ්ටයන් ය. ජොන්ටි රෝඩ්ස්ට අනුව ලොව දක්ෂතම පන්දු රකින්නා සුරේෂ් රෙයිනා ය. ඔවුන්ගෙන් බලාපොරොත්තු වන්නේ එපමණකි. එහෙත් ඔවුන් ඊට වඩා දස්කම් දක්වන සෑම විටකම තරගයේ ජයග්‍රහණය ඔවුන්ගේ කණ්ඩායම සතුවෙයි. හර්දීක් පාන්ඩ්යා එම ස්ථානය හොබවන වත්මන් ඉන්දීය ක්‍රීඩකයාය.දකුණු අප්‍රිකානු කණ්ඩායමේ ජොන්ටි රෝඩ්ස්, ලාන්ස් ක්ලූස්නර්, ක්‍රිස් මොරිස්, ජේ.පී. ඩුමිනි එවැනි තරග වෙනස් කරන්නන් ය. ඕස්ට්‍රේලියාවේ ඇඩම් ගිල්ක්‍රිස්ට්, ඇන්ඩෲ සයිමන්ඩ්ස්, ග්ලෙන් මැක්ස්වෙල්, මාක්ස් ස්ටොයිනිස්, මයිකල් බෙවන්, ඇන්ඩි බිකල් එවැන්නන් ය.නවසීලන්තයේ ක්‍රිස් හැරිස්, කෝරි ඇන්ඩර්සන්, කොලින් ඩි ග්‍රෑන්ඩ්හම් ඒ ගණයෙහි ලා සැලකිය හැකිය. එංගලන්තයේ පෝල් කොලින්ග්වුඩ්, බෙන් ස්ටෝක්ස්, ජේසන් රෝයි, ජොස් බට්ලර් එවැන්නන් ය. පාකිස්තානයේ අබ්දුර් රසාක්, ෂහීඩ් අෆ්රිඩි එවැන්නන් ය.ශ්‍රී ලංකාවට තරග ජයග්‍රහණය කරන්නට නම් අත්‍යාවශ්‍යව ඇත්තේ ද අසාර්ථක වීම් අඩු, සාර්ථක වීම් වැඩි එවැනි තරග වෙනස් කරන්නන් වේ. භානුක රාජපක්ෂ, කමිඳු මෙන්ඩිස්, අශාන් ප්‍රියන්ජන්, දසුන් ශානක එසේ යොදාගත හැකි ක්‍රීඩකයන් ය.

වර්තමාන තරග දිනවන්නෙකුගේ විශිෂ්ටත්වය – දැන් අපට තරග වෙනස් කළ හැකි ක්‍රීඩකයන් නැති තරමට අප පහතට වැටී තිබේ ද? එය බොහෝ දෙනාට ඇති ගැටලුවකි. අපි මාස කිහිපයක් පසුපසට අපගේ මතකය රැගෙන යමු.2019 දකුණු අප්‍රිකාවට එරෙහි ටෙස්ට් තරගාවලියේ පළමු ටෙස්ට් තරගය ජය ගැනීම සඳහා කුසල් පෙරේරා ක්‍රීඩා කළ ඉනිම අති විශිෂ්ට එකක් බව සියලු දෙනාම පිළිගනියි. ඒ “සියලු දෙනාගෙන්” හරි අඩක්ම තරගය ජයග්‍රහණය කළ නිසා සතුටු වන්නන්ය. තවත් පිරිසක් කුසල් පෙරේරා නම් ක්‍රීඩකයාට ඇති ආලය නිසා එය විශිෂ්ට යැයි කියන්නන් ය. තවත් පිරිසක් එහි ගණිතමය විශේෂත්වය මත ඊට කැමති වූවන් ය.එහෙත් කුසල්ගේ ජයග්‍රාහී ඉනිමේ දී ඔහු පන්දු ඕවර හැසිර වූ ආකාරය, පන්දු ඕවරයක අවසන් පන්දු කිහිපයේ දී ලබා ගත යුතු ලකුණු ප්‍රමාණය තීරණය කළ ආකාරය සහ පීඩනය පන්දු යවන්නන් වෙත තැබූ ආකාරය හසුකරගත හැක්කේ “ක්‍රිකට් බුද්ධියට”ය. “ක්‍රිකට් බුද්ධිය” ඇති ප්‍රේක්ෂක ප්‍රමාණය ද ක්‍රීඩකයන්ගේ ප්‍රමාණය ද පහත බසිමින් පවතින බව පුන පුනා කියමින්ම අපි කුසල්ගේ ඉනිම පැහැදිලි කරගනිමු.

ජගත් ක්‍රිකට් කවුන්සලය

එංගලන්ත ආරම්භක පිතිකරු ජේසන් රෝයිට ජගත් ක්‍රිකට් කවුන්සලය විසින් දඩ පනවා තිබෙනවා.ඒ, ඊයේ (12) ඔස්ට්‍රේලියාවට එරෙහිව නිමා වූ දෙවන අවසන් පූර්ව තරගයේ දී ඔහු අයි.සී.සී විනය නීති සංග්‍රහය උල්ලංඝනය කිරීම හේතුවෙන්.ජේස්න් රෝයි විසින් කඩුලු රකින ක්‍රීඩකයාට උඩ පන්දුවක් ලබා දී දැවි ගිය බවට විනිසුරු කුමාර් ධර්මසේන ලබා දුන් තීන්දුවට එකග නොවීමයි ඔහුට එරෙහි චෝදනාව වූයේ.පුනරූපනවලින් පෙන්නුම් කළේ එම පන්දුව ජේසන් රෝයිගේ පිත්තේ නොවදින බවයි.කෙසේ වෙතත්, විනිසුරු තීරණය අවසන් තීරණය වන බැවින් ජේසන් රෝයිට පිටියෙන් ඉවත් වීමට සිදු වුණා.එම අවස්ථාවේ දී ඔහු දැඩි ලෙස විනිසුරු තීරණය අභියෝගයට ලක් කරනු දක්නට ලැබුණා.එය අයි.සී.සී විනය නීති සංග්‍රහය උල්ලංඝනය කිරීමක් බවටයි තරග තීරක රංජන් මඩුගල්ල තීරණය කළේ.ඒ අනුව ජේසන් රෝයිට තරග ගාස්තුවෙන් 30%ක දඩ මුදලක් පැනවීමටයි ජගත් ක්‍රිකට් කවුන්සලය පියවර ගත්තේ.

කණ්ඩායමක් ලෙසින්

මෙවර ලෝක කුසලාන කි‍්‍රකට් තරගාවලියට සහභාගී වූ ශී‍්‍ර ලංකා කණ්ඩායමේ දක්‍ෂතා සහ දුර්වලතා පදනම් කර ගනිිමින් ජාත්‍යන්තර කි‍්‍රකට් කවුන්සිලය විසින් ප‍්‍රගති වාර්තාවක් එළිදක්වා තිබෙනවා. එහි දක්වා ඇත්තේ ශී‍්‍ර ලංකා පිළ තරගාවලියට එක්වූයේ අස්ථාවර කණ්ඩායමක් ලෙසින් බවයි.නවක නායකයෙකු සහ කී‍්‍රඩකයින් කිහිප දෙනෙකු කලකට පසු එක්දින සංචිතයට එක්වීම ඊට හේතු ලෙස දක්වා තිබුණා. කෙසේවෙතත් ලෝක කුසලානයේදී ශී‍්‍ර ලංකා කණ්ඩායමේ සාධනීය කරුණු දෙකක් අදාළ වාර්තාවෙන් අනාවරණ කර තිබෙනවා. එක් කරුණක් වන්නේ තවමත් 21 වන වියේ පසුවන අවිශ්ක ප‍්‍රනාන්දුගේ දක්‍ෂතායි. එමෙන්ම ජ්‍යෙෂ්ඨ කී‍්‍රඩකයින් වන ලසිත් මාලිංග සහ ඇන්ජලෝ මැතිව්ස්ගේ දක්‍ෂතාද එහිදී අගය කර තිබෙනවා.ලෝක කුසලාන කි‍්‍රකට් තරගාවලියේදී ශී‍්‍ර ලංකා කණ්ඩායමේ පන්දු යවන්නන් බිද හෙළා ඇත්තේ කඩුළු 30 ක් පමණයි. ඒ සඳහා පන්දුවාර 219 යි පන්දු 3 ක් වැය කර තිබෙනවා. එහෙත් ඕස්ටේ‍්‍රලියාවේ මිචෙල් ස්ටක් එම පන්දුවාර සංඛ්‍යාවෙන් තුනෙන් එකක් පමණක් යවමින් කඩුළු 26 ක් බිද හෙළා ඇති බවයි අදාළ වාර්තාවේ දැක්වෙන්නේ. ලෝක කුසලාන කි‍්‍රකට් තරගාවලියේදී ශී‍්‍ර ලංකා කණ්ඩායමේ පිතිකරුවන් දෙදෙනෙකු අතර ලකුණු සියයක සබඳතා ගොඩනැගී ඇත්තේ අවස්ථා 2 කදී පමණයි. එහෙත් ඉන්දීය කණ්ඩායමේ ආරම්භක පිතිකරුවන් පමණක් එවැනි සබදතා 4 ක් ගොඩනගා ඇති බවයි ජාත්‍යන්තර කි‍්‍රකට් කවුන්සිලයේ ප‍්‍රගති වාර්තාවෙහි සඳහන්ව ඇත්තේ.ශී‍්‍ර ලංකා කණ්ඩායමේ කඩුල්ලක් ලකුණු 26.14 ක සාමාන්‍යයක් තුළ බිද වැටී තිබෙනවා. එසේ ගත් කළ ශී‍්‍ර ලංකා කණ්ඩායමට සියළු දෙනා දැවී තරගයකදි රැස් කර ගත හැකි සාමාන්‍ය ලකුණු සංඛ්‍යාව 261 ක්. එය තරග ජයග‍්‍රාහී ලකුණක් නොවන බවද ජාත්‍යන්තර කි‍්‍රකට් කවුන්සිලය වැඩිදුරටත් පවසනවා.

නිවාස වලට

මෙවර ලෝක කුසලානයේ පළමු අවසන් පූර්ව තරගයෙන් නවසීලන්තය හමුවේ එංගලන්ත කණ්ඩායම ලැබූ පරාජයත් සමග ඉන්දියානු ක්‍රිකට් රසිකයන් දැඩි ලෙස නොසන්සුන් වී තිබෙනවා. තවද ඉන්දීය මාධ්‍යයද ලෝක කුසලානය දිනා ගැනීමට නොහැකි වූ සිය කණ්ඩායමට පහර දීම අරඹා තිබෙනවා.මේ අනුව එරට කණ්ඩායමේ නායක හා ශ්‍රේණිගත කිරීම්හි ලොව අංක එකේ පිතිකරු විරාත් කෝලී, ලෝක කුසලානයේ ශතක පහක් රැස් කළ රෝහිත් ෂර්මා, ලෝක කුසලාන දිනු හිටපු නායක මහේන්ද්‍ර සිං දෝණිගේ නිවාස වලටද ආරක්ෂාවක් සපයා තිබෙනවා.ඉන්දියාව මෙවර ලෝක කුසලානයේ සුපිරි දක්ෂතා දැක්වූ අතර ඔවුන් පළමු වටය අවසන් කළේ ප්‍රසාද ලකුණු පුවරුවේ අංක 1 කණ්ඩායම ලෙසටයි. රෝහිත් ෂර්මා මෙවර ලෝක කුසලානයේ වැඩිම ලකුණු ලාභියා වෙමින් ශතක පහක් රැස් කරමින් ලෝක වාර්තාවක්ද පිහිටවීය.නමුත් එක තරගයක් පරාජය වූ සැණින් ඉන්දීය රසිකයන් සහ මාධ්‍ය මගින් කණ්ඩායමට එක් කරනා මෙම විවේචනාත්මක පීඩනය ඉන්දීය කණ්ඩායමේ සාර්ථකත්වයට රහස බව විචාරකයන් පෙන්වා දෙනවා. ඔවුන් පවසන්නේ මෙම විවේචන හේතුවෙන් ඉන්දීය ක්‍රීඩකයන් තරග පරාජය වීමට බිය වී සිටින බවයි.කෙසේ වෙතත් ලෝක කුසලානයේ ලජ්ජා සහගත පරාජයක් ලබමින් පළමු වටයෙන්ම ඉවත් වූ ශ්‍රී ලංකා කණ්ඩායම පසුගියදා ශ්‍රී ලංකාවට්ර පැමිණි අතර ශ්‍රී ලංකා ක්‍රීඩකයන් සහ නිළධාරීන් කිසිඳු පසුතැවිල්ලක් හෝ ලැජ්ජාවක් නොපෙන්වමින් මාධ්‍යයට සහ රසිකයන්ටම විවේචන එල්ල කිරීම විශේෂත්වයකි.

අවාසනාවන්ත කතාව

නවසීලන්තය සමග ඊයේ පැවති ලෝක කුසලාන අවසන් පූර්ව තරඟය ලකුණු 18 කින් ඉන්දියාව පරාජයට පත් වුණා.මෙහිදී ලොව බොහෝ ක්‍රිකට් විචාරකයින්ගේ හා ක්‍රීඩා ලෝලීන්ගේ අවධානය යොමු වුනේ ඉන්දීය ප්‍රහාරාත්මක පිතිකරුවන් වන රෝහිත් ශර්මා ,විරාත් කෝලි හා K A රාහුල් පිළිබඳවයි.නමුත් නවසීලන්ත කණ්ඩායමේ පන්දු යවන්නන් හමුවේ දැඩිව අසරණ වූ මෙම පිතිකරුවන් තිදෙනා සියලු ක්‍රිකට් විචාර අසත්‍යක් බවට පත් කරමින් වගේම ක්‍රීඩා ලෝලීන්ගේ සිහින බොඳ කරමින් ලකුණු එකකට දැවී ගියා.ඒ ඉන්දියාවේ ලකුණු තත්වය ලකුණු 5කව තිබියදී කඩුළු 3කම ලකුණු පුවරුවේ සටහන් කරමින්.මෙහිදී වැඩි අවධානයක් දිනා ගත්තේ ඉන්දීය නායක විරාට් කෝලියි.අතීතයේ ඊටම කෝලිගේ ලෝක කුසලාන අවසන් පූර්ව තරග ඉතිහාසය එතරම් හොඳ මට්ටමක තිබී නැහැ. මන්දයත් ඔහු සහභාගී වූ ලෝක කුසලාන අවසන් පූර්ව තරඟ එකකදී හෝ ඔහුට ලකුණු 10 සීමාව පසුකර යාමට අවස්තාව හිමිවී නැති නිසා.මෙවන් තත්වයක ඊයේ තරඟයේදීත් තම ඉතිහාසය අලුතින් ලියු කෝලි ලකුණු 1කට දැවී ගියා.කොලිගේ තරඟ වාර්තා පහත පරිදි වනවා.